Home Local Lo por surgi interupcionnan cortico DURANTE FEBRUARI Y MAART...

Lo por surgi interupcionnan cortico DURANTE FEBRUARI Y MAART WEB ARUBA LO INTEGRA UNIDADNAN DI CORIENTE RIBA ‘IGMS’

 

 

 

ORANJESTAD –   Operacion di e planta di energia di WEB Aruba te ainda pa gran parti ta sosode manualmente. E compania di produccion pronto lo trece cambio den esaki cu un sistema automatisa cu yama ‘Intelligent Generation Management System’ (IGMS). Durante lunanan di februari y maart, WEB lo integra tur su unidadnan di produccion di coriente y energia sostenibel den e sistema IGMS. Di e forma aki lo regula e suministro di coriente automaticamente. Durante e proceso, clientenan lo por experencia interupcion di coriente pa corto tempo (menos di 15 minuut). Lo mantene pueblo debidamente informa ora di haci prueba di e sistema. IGMS ta forma parti di e combinacion di proyecto y inversionnan cu WEB Aruba a bin ta haci pa por ofrece awa y coriente na un manera confiabel, pagabel y sostenibel.

 

WEB Aruba ta genera energia cu un combinacion di ekipo di generadornan, turbinanan, motornan RECIP, parkenan solar y molinanan di biento. Entretanto e compania tambe a construi un parke cu e sistema di ‘Flywheel’ y a adkeri baterianan TESLA cu cual ta almacena energia di fuentenan sostenibel manera solo y biento. Diariamente operadornan di WEB Aruba ta maneha e planta manualmente. Esey ta rekeri atencion constante, pero tambe habilidad casi sobrehumano pa dicidi rapidamente cua ekipo ta lanta na cua momento durante un desbalance entre demanda y suministro di coriente. Cu IGMS, WEB Aruba lo por mantene e suministro di coriente pa ELMAR mas stabil y den futuro lo por integra mas unidad pa sostene e operadornan. Tambe ambos compania lo por actua mas liher ora di interupcion y of desbalansa den e demanda.

 

Implementacion di IGMS ta un logro mas den e esfuersonan di WEB Aruba pa yega na su vision di ta greener, cleaner and fuel oil free. Aunke no ta premira interupcion, ta pidi comunidad di Aruba comprension en caso cu surgi interupcion di coriente den e lunanan venidero. Lo informa debidamente ora lo por spera interupcion. Ta enfatisa cu e interupcionnan aki lo ta menos di 15 minuut. Di antemano ta pidi disculpa pa inconvenencia cu por surgi, debi na e trabounan di integracion. Pa posibel pregunta lo por tuma contacto cu Call Center di WEB Aruba na telefon 525-4200. Ta recomenda clientenan pa ‘like’ e pagina di Facebook di WEB Aruba pa keda na altura di e proceso y di posibel interupcionnan.