ORANJESTAD – Oficina di Monumento a brinda Minister Ruiz-Maduro un recorido den e edificio di Bestuurskantoor pa asina mira e avanse di e trabaonan di restauracion cu ta tumando lugar. Bestuurskantoor ta e centro di gobernacion pa nos Pais ya pa 50 aña caba. Durante e recorido e mandatario y e personal a ricibi informacion y asina a haya sa un tiki mas di e historia di e edificio y por a mira e detaye cu Oficina di Monumento a bin ta conserva di e monumento aki di nos Pais.
Un poco di e historia di e edificio di bestuurskantoor situa na L.G. Smith Boulevard 76. Ta asina cu debi na e participacion di islanan ABC den segunda guera mundial y como parti di Reino Hulandes, Aruba mester a wordo protegi contra atake di enemigonan. Na añanan 1942-1943 e edificio aki a wordo construi y na 2010 el a wordo registra como edificio monumental. E campamento militar a wordo construi como barak pa e oficial- y pasaheronan. E diseño original ta di e Departamento di Obranan Publico di Corsow. E structura a ocupa un gran parti di L.G. Smith Boulevard e tempo ey. E compleho a wordo diseña di tal manera cu e edificionan facilmente lo por wordo usa pa otro meta despues di guera.
Aruba inmediatamente despues di guera, e structura a wordo conberti den oficinanan publico. Sinembargo, hopi edificionan a wordo basha abao pa asina por a duna lugar pa un centro comercial moderno y un hotel. E otro parti te dia awe ta wordo usa como Oficina di Gobierno. E edificio a wordo diseña pa resisti e clima tropical por tuma nota di e fachada climatico, cu hanchinan profundo, verandanan di concreto, e kozijnnan di e portanan, bentananan yalusi. Otro caracteristicanan ta ta e seccionan di construccion pa e circulacion di biento y e espacionan interior grandi habri. E Oficina di Gobierno ta estableci den e edificio aki desde añanan 50 y esey ta e di cuater edificio cu oficina di gobierno. E edificio aki como tambe e edificio di corte ta e unico edificionan cu pa mas di 50 aña a wordo usa pa mesun proposito cada uno.
Despues di e restauracion nos lo por wak bek partinan di e plafond y dak original di e edificio. Tambe lo por mira e comparticion original di e edificio cu tabata un lugar di hospedahe pa militar. Aki algun luna e parti monumental di Bestuurskantoor lo keda completa y e mandatario ta spera cu via e potretnan di antes aloca na partinan restaura, nos por mustra e historia cu e edificio ta conta nos. Minister Ruiz-Maduro ta gradici tur empleado di Oficina di Monumento pa nan trabao valioso di conserva patrimonio di nos Pais