Oranjestad – Botica di Servicio a conduci exitosamente nan di dos careda annual “Diabetes Run” riba diadomingo, 11 di November, 2018 na honor di e Dia Mundial di Diabetes. Esaki tabata un dia cu hopi entusiasmo pa tur cu a participa pa recauda fondo pa un bon causa. Tabatin mas cu 650 participantenan y premionan special a wordo duna na esnan cu tabata na prome, di dos y di tres lugar den nan categoria.
Tur participantenan tabatin e oportunidad pa registra online riba nos website, pero tambe nan tabatin e opcion pa paga y registra na IBISA Aruba. Na IBISA, participantenan por a bay y colecta nan shirtnan y numbernan pa e careda. “Instituto Biba Saludabel y Activo” ta un organisacion institucional cu ta yuda promove salud y bienestar riba nos isla. Hunto, nos a traha riba e Dia Mundial di Diabetes pa crea mas conocimento tocante e condicion cronico serio aki.
Pa basta aña caba, Aruba tabatin un aumento den number di casonan di Diabetes. “Fundacion Diabetes Aruba” ta e fundacion respetable cu ta informa y crea conocimento den nos comunidad tocante e malesa cronico aki. Nan ta menciona cu “80% di e casonan di Diabetes por wordo preveni dor di hiba un bida saludabel”. E careda ta un esfuerso pa trece algun cambionan saludabel den e estilo di bida y mehoracion pa nos communidad.
Ademas, nos tabata por a yuda varios muchanan afecta pa e malesa aki cu e donacion di Jerry The Bear’s. Dor di uso di e beer y e hermentnan virtual den e aplicacion aki, muchanan por check e nivel di sucu di e beer, selecta cuminda, conta hidrato di carbon y administra insulina. Den e proceso, e muchanan y nan famia lo siña y comprende mihor con pa cuida nan mes.
E careda a cuminsa 6am y a sigui facilmente te cu mas laat den mainta. Di e 650+ participantenan, mas o menos 75 tabata mucha. Na e liña final participantenan a wordo ofreci diferente tipo di snack y bebida refrescante pa hidrata y fresca nan mes.