21 di februari y dia 7 di maart, lo ta e proximo dos dianan caminda cu un total di 410 famia ta haya oportunidad un biaha mas pa bin na remarke pa un ‘pre-reservering’. Ta trata peticionnan entrega na añanan 2005 y 2006. Minister di Desaroyo Teritorial, Infrastructura y Medio Ambiente, Otmar Oduber durante conferencia di prensa semanal di Gobierno a duna splicacion locual cu por spera pa locual ta otorgacion di tereno.
Manera ta conoci a cuminsa cu un proceso di ‘verschoning’ di e database di Directie Infrastructuur en Planning (DIP) di peticionnan di añanan 1989 bin ariba. Ta consciente cu haciendo esaki lo a encontra poco di esnan cu por a reacciona considerando cu ta peticion di casi 30 aña bieu y cu e personanan aki aworaki ya a cumpra un cas. E meta ta pa e aña aki cuminsa trata peticion di 2010, cual ta significa cu ta haya e peticionnan mas recien cu ta hacie hopi mas factibel pa esnan cu ta bin na remarca por ricibi financiamento pa construi nan cas.
Algo cu a bin dilanti hopi fuerte ta cu mas y mas hendenan ta buscando terenonan mas chikito. Den pasado e tabata custumber cu hende ta pidi tereno entre 600 cu 750 meter cuadra. Sinembargo, aworaki gran mayoria ta busca terenonan entre 300 cu 450 meter cuadra. Esaki ta pone cu henter e proceso di ‘verkaveling’ cu tabata tuma luga na DIP ta cambia di caracter y pues e aña aki ta crea 1000 percela mas pa otorga na pueblo. Entre aña pasa y e aña aki tin mas o menos 1900 pa 2000 percela di casnan cu ta disponibel caba pa wordo otorga. Segun Minister Oduber a splica, comunidad lo sinti cu poco mientras cu ta yega mas cerca di peticionnan actual, mas hende lo bin positivamente na remarke pa pasa di e proceso di ‘pre-reservering’ pa ‘reservering’. Esaki lo significa tambe cu mas construccion ta inicia e aña aki.
“Den e siman aki ya caba e famianan lo cuminsa ricibi nan invitacion pa por ricibi nan carta di pre-reservering, dunando nan e oportunidad pa por construi nan hogar. E ta un orguyo sumamente grandi cu e departamentonan concerni ta atendiendo na un forma responsabel cu e data base cu tabatin mas di 12 mil peticion. Atendiendo cu peticionnan mas bieu prome, contrario na pasado cu tabata duna illusion falso na nos ciudadannan caminda cu mas di 5000 documento a wordo firma sin cu esakinan a wordo registra y sin cu tabatin tereno haci disponibel of fondo pa haci inbreiding. Aworaki esaki si esaki ta posibel a traves di e presupuesto cu tin. Un presupuesti cu tin su limitacionnan pero cu cual ta logrando e meta di por saca e cantidad di terenonan pa cas aki”, Minister Oduber a termina splicando.