Home Politics Siman di ‘Design Thinking’ pa Sector Publico GOBIERNO DI ARUBA PONIENDO E...

Siman di ‘Design Thinking’ pa Sector Publico GOBIERNO DI ARUBA PONIENDO E SER HUMANO CENTRAL DEN MANEHO

SHARE

 

Durante e siman di 4 di februari a tuma luga e prome siman di Human-Centered Design Thinking organisa pa Futura, e fundacion di gobierno encarga pa ehecuta e maneho di innovacion.
Hunto cu varios stakeholders a fiha e principionan di maneho di desaroyo di capacidad y e.o. training den empleadonan publico y di sector priva pa stimula innovacion den sector publico.

Tene e ser humano central ta e meta di Gabinete Wever-Croes y pa e motibo aki ta importante pa aplica e metodologia di Human-Centered Design Thinking pa diseña programanan cu lo sigura cu sector publico por brinda un miho servicio pa e ciudadano y pa por crea mas progeso y prosperidad.

Durante e siman importante aki, diferente stakeholders a reuni cu Dr Melis Senova di Australia, un experto den Design Thinking cu un PhD den factornan humano. Dr Senova ta autor di e buki This Human y tin experiencia amplio trahando cu diferente gobierno y organisacionnan renombra rond di mundo riba strategia pa maneho economico, innovacion, transformacion di institutonan y desaroyo di capacidad.

E sesionnan a conta cu un total di 120 participante di sector publico, priva, NGOs, sector academico y comision CWIEDO di Parlamento di Aruba. Den un forma interactivo por a duna input riba e maneho historico di sector publico y condicionnan pa cambio sistematico cu no lo wordo afecta pa eventual cambionan di gobierno den futuro.

Durante un reunion cu Minister President, Evelyn-Wever Croes, Dr Senova a comparti su observacionnan inicial di e sesionnan y conseho pa proximo pasonan. Remarkabel ta cu Dr Senova a observa cu aunke tin diferente reto cu mester di atencion, Aruba su sector publico sin duda tin e gana y a mustra e compromiso pa cu transformacion di e sector teniendo e ser humano central, y asina beneficia e ciudadano.

E estudio di e siman di Design Thinking, input di stakeholders y observacionnan di Dr Senova lo ta base di e diseño di un programa nobo pa desaroya capacidad y ‘mindset’ pa innovacion di sector publico cu lo cuminsa den 2019.