Desde 1986 mayoria di e desaroyo economico a bay den direccion di turismo unda cu awe esaki ta 90% di nos economia. Den pasado nos a experencia varios industria manera sector di cabay, fosfaat, aloe y petrolio pero niun no a duna e impacto manera turismo. Mirando con largo San Nicolas a keda sin representacion den desaroyo economico social, e gobierno di Sra. Evelyn Wever Croes den programa di gobernacion “Hunto Pa Aruba” porfin ta duna San Nicolas su fair share. Manera Martin Luther King Jr., un lider di Merca a yega di bisa: “The time is always right to do what is right.” E expresion aki no por ta mas al caso mirando cu San Nicolas como districto a wordo lubida totalmente. Den un pais desaroya manera Aruba no tin espacio pa e mentalidad aki prevalece.
Proyecto pa pone economia draai
Tin varios iniciativa cu lo concretisa e aña aki, den sector primario, turistico, maritimo, medico, cinematico y sigur no mester descarta e posibilidad di e sector di aviacion. Nos mester un proyecto cu por trek e desaroyo economico social den e area aki di Aruba. Claro cu tin preocupacion pa cu mas desaroyo y p’esey esaki mester wordo planea bon. Nos sa cu e beachnan ta limita y nos no kier beach priva na Aruba. Parti pabao ta satura cu ta afecta calidad di bida di nos hendenan. No por ripiti problemanan di pasado manera escasez di school, vivienda, integracion, salud publico etc. Si planea e proyectonan bon esaki lo tin mas beneficio pa nos pais y sigur mirando e desempleo actual di San Nicolas pa no bisa Aruba den su totalidad. Nos mester e proyecto aki pa cuminsa buta nos economia draai pasobra segun CBS San Nicolas ta e districto cu tin un di e economianan mas fragil cu ta stroba pa comercio y otro actividadnan progresivo tuma lugar. Nos tin un Golf course, Boca Grandi, Baby y Rodgers beach, Cero Colebra y Cero Colorado keto bay sin infrastructura adecua. Esaki simplemente no por mas.
No tin tempo pa negativismo
E ley di zonificacion Ruimtelijke Ontwikkelingsplan (ROP) t’ey, awo ta tempo pa desaroyo responsabel y structura. Nos mester mas vivienda. Sigur na San Nicolas esaki lo duna un boost pa e sector di construccion y yuda cu e comercio nobo cu lo bin durante e añanan venidero. Incentivonan fiscal ta necesario, por ehempel pa facelift e propiedadnan, pa emplea mas hoben y pa otro actividadnan cu ta beneficia comunidad. Nos kier mas negoshi chikito conoci como entrepreneur pa brinda servicionan na e hotelnan cu lo bin. Implementacion di Cultural Heritage y Innovacion manera e sector creativo/knowledge economy. Un bes cu tin un inversion di magnitud, esaki lo trece e infrastructura – manera den pasado “Plan Sasaki” – e biaha aki pa San Nicolas y vecindario. Lo mester implementa un plan di zonificacion den centro di San Nicolas y fomenta trankilidad den areanan residencial. No tin tempo pa negativismo. Ban buta nos inteligencia, boluntad y union hunto pa nos logra algo positivo pa nos pais cu lo beneficia tur hende y porfin por crea un clase media mas grandi, consecuentemente un pais mas sostenibel den tur sentido.