Oranjestad, Aruba, – Diabierna mainta Refineria di Aruba N.V. (RdA) a convoca un conferencia di prensa unda a elabora tocante e situacion actual di e proyecto di rehabilitacion di e Refineria na San Nicolas, cu tin como operador Citgo Aruba Refinery (CAR). Sr. Koolman— CEO y Managing Director di Refineria di Aruba N.V.,  kende a hiba palabra, a papia tocante diferente puntonan y a splica con e proyecto y financiamento ta hinka den otro y kico lo por spera den un futuro sercano.

Na anja 2012, Valero Aruba a stop su operacion pa e motibo cu e refineria no tabata rendabel. Valero Aruba no tabata produci ni Gasolin, ni Diesel na e specificacionan rekeri pa e mercado mundial. Inversionan cuantioso tabata necesario pa por logra subi e complexidad di e operacion pero den un atmosfera cu tin exceso di capacidad di refinacion den e region atlantico, e inversionan aki no tabata hustifica. Logicamente ora e refineria a sera, e tarea tabata dificil pa buska un compania cu lo kier inverti den nos refineria. Manera indica, e unidadnan di proceso existente di Aruba no por produci productonan liviano y pa hasiele economicamente viable como refineria, inversionan cuantioso ta necesario. Sinembargo cu mesun unidadnan di proceso aki, e refineria por ser converti den un mehorador (Upgrader) di crudo extra pisa di e faha petrolifera di Orinoco, cu tin un reserva di alrededor di 300 mil miyon bari. E economia di Venezuela ta depende 95% di e produccion di crudo y esaki ta hasi cu un proyecto manera Aruba, unda cu no mester inverti den procesonan nobo, sino rehabilita esunan existente, ta hasi e proyecto masha atractivo, mas aun cu e por wordo realiza den un periodo relativamente corto di 16 pa 18 luna. E inversion previsto pa por rehabilita e Refineria como mehorador di crudo ta $1.2 mil miyon, cu ta inclui e linea di gas natural for di Venezuela. Como referencia, pa rehabilita e refineria y inclui unidanan nobo di conversion pa produci productonan liviano lo exigí mas of menos $2-$2.5 mil miyon adicional.

Aunke cu e proyecto como Upgrader enberdad ta uno hopi atractivo ariba su mes, e sancionan imponi ariba e regimen Maduro, ta hasi casi imposibel pa Citgo Aruba por haya un instituto finaciero pa por a financia e proyecto aki. Di otro banda no por kita e Refineria for di Citgo Aruba, y bin cu un otro operador sin mas ya cu e lo causa un “incumplimento di contract”, cu tur e consecuencianan adverso pa Aruba cu tin cu ne mara den e acuerdonan. Al fin al cabo lo bo mester di Venezuela toch pa su crudo extra pisa pa por opera como Upgrader.

Con Citgo Aruba ta structura?

Na comienzo di e negosacionan na 2015, e plan inicial tabata pa pone Citgo Aruba, bou di Citgo Petroleum. Pero na final di 2015 caba Citgo Petroleum a laga sa cu analistanan financiero ta conseha pa no por pone un carga financiero adicional cu Citgo Aruba ta trese cu ne, bou di Citgo Petroleum. E resultado e ora tabata cu Citgo Aruba lo cai bou PDV-Holding. PDV-Holding ta un compania estableci na Delaware, cu ta donjo di Citgo Petroleum Holding. Citgo Petroleum Holding ta entre otro donjo di e refinerianan di Citgo Petroleum Refinery na Merca. Citgo Aruba Holding cu tambe ta establesi na Delaware, ta resorta bou PDV-Holding, unda cu Citgo Aruba Holding ta doño di Citgo Aruba Refinery, Citgo Aruba Terminal y Citgo Aruba Marine.

E sancionan decretal na augustus 2017, a hasi dificil pa por haya fianza pa e proyecto aunke cu si por a keda opera Aruba. E sancionan nobo decreta un siman y mei pasa, sinembargo ta trese reglanan nobo cu ne. Ademas Cas Blanco a anuncia cu tur pago pa crudonan venezolano procesa na Merca lo mester wordo deposita den un “Blocked Account” y cu nada no por bai bek pa PDVSA actual. Kiko esey ta hasi cu e operacion di Aruba? Te prome cu e sancionan nobo aki a bin na vigor, Aruba su operacion ta wordo financia door di e benta di productonan petrolera di Citgo cu mester paga PDVSA pa e crudo procesa. Mensualmente, PDVSA ta autoriza Citgo Petroleum  pa paga PDV-Holding cierto suma destina pa Citgo Aruba Holding por cubri gastonan di operacion di su tres filialnan na Aruba. Cu e sancionan nobo eski no por mas. Citgo Petroleum mester deposita tur e suma pa e crudo procesa di PDVSA den un blocked account. Pa Citgo Aruba Holding haya e placa necesario pa su operacion, un autoridad cu ta designa dor di e Presidente Guaido mester duna aprobacion.

RdA, Gobierno di Aruba (GoA) y Citgo Petroleum ta den discussion pa sigura cu Aruba haya e fondonan necesario pa sigui su operacion y termina fase 2 di e proyecto. E sancionan contra e regimen di Maduro en realidad ta hasi e situacion dificil pa haya financiamento, y si acaso bin un cambio, e Proyecto di Aruba aki lo ta uno di sumo importancia pa Venezuela como tambe pa Aruba. Den un buki cu a wordo publica recientemente “Venezuela Energetica” di Leopoldo Lopez y Gustavo Baquero, ta delinea kico ta e prioridad di Venezuela den un cambio di gobierno. E number UN prioridad ta pa subi e produccion di crudo y gas na 4 pa 5% pa anja te cu 2030. Esaki ta unda Aruba su proyecto ta hunga un rol importante, ya cu dentro di un periodo relativamente corto por subi e produccion di crudo venezolano na un total di 150 mil bari pa dia of 10% di e produccion actual.

E proyecto di rehabilitacion di e refineria y converti den un upgrader ta uno cu no tin duda cu lo wordo realiza. E riesgo si cu tin ta cu e lo por wordo poni ariba un “Hold” durante di e situacion actual y durante di un transicion di gobierno na Venezuela. Gobierno di Aruba y RdA ta sigurando pa esaki no bira e caso. Actualmente, tin mas of menos 300 hende ta traha den Refineria, directamente como empleado di Citgo Aruba y indirectamente cu varios companianan di contratista. RdA tin entendi cu pa e fase 2 andando tin un Purchase Order (PO) pa extende cierto trabounan no lo wordo duna, cual lo afecta 4 compania local.

RdA ta lamenta si cu e lider sindical a anuncia cu nan ta pone e producccion di Aruba su productonan petrolero plat. Ta importante pa menciona cu tur producto ta wordo importa door di Fuels Marketing & Supply Aruba N.V.(FMSA) – cu ta e compania distribuidor di gasolin, diesel, jet fuel y fuel oil ariba nos isla. E productonan aki ta wordo almacena den tanki, cu enberdad ta wordo leased door di Citgo Aruba, pero no tin ningun motibo pakico e distribucion ni almacenahe lo wordo poni den peliger. Mas aun eta hopi irresponsabel pa bisa cosnan asina mirando e situacion actual y trese panico den nos comunidad sin tin mester.

Finalmente, nos ta desea di enfatisa un biaha mas cu RdA hunto cu Gobierno di Aruba ta hasiendo tur e contactnan necesario pa delinea e importancia pa Aruba di e proyecto aki y cu pone e fase aki on hold pendiente di e situacion na Venezuela no ta uno favorable ni pa Aruba pero tampoko pa Venezuela. Nos tur ta trahando cu determinacion pa realiza e Proyecto tan importante aki pa ambos pais.

Pa mas informacion por tuma contacto cu Refineria di Aruba N.V. na 281-0100, por manda un mensahe via nos pagina di Facebook of por manda nos un e-mail na [email protected].