Home Politics PROME MINISTER TA REUNI CU SINDICATONAN Gabinete Wever-Croes kier ancra e...

PROME MINISTER TA REUNI CU SINDICATONAN Gabinete Wever-Croes kier ancra e plataforma pa dialogo tripartiet den ley

SHARE

 

 

 

 

Fin di siman pasa, Prome Minister Evelyn Wever-Croes a atende un reunion cu sindicatonan di Aruba y a expresa e aprecio y respet cu nos gobierno tin pa sindicatonan. Na e ocacion aki, Prome Minister a representa e Minister encarga cu Labor, Glenbert Croes.

 

E vision di Gabinete Wever-Croes ta pa dialoga cu sindicatonan den decisionnan importante di nos pais. Gobierno kier mira un plataforma pa dialogo tripartiet entre e gremionan cu ta representa e trahadornan, gremionan cu ta representa e dunadonan di trabou y Gobierno. Ta e intencion cu cada partido sinti cu nan vision ta worde presenta den e dialogo tripartiet pa evita cu cualkier desapunto di pasado bin bek riba mesa.

 

E importancia di un dialogo tripartiet ta pa evita cu cualkier gobierno ta tuma desicionnan unilateralmente sin consulta suficiente cu tur e gremionan cual ta un riesgo real cu a y ta pasa den tur gobernacion. Gabinete Wever-Croes kier percura pa semper tin un mechanismo permanente di consulta.

 

Prome Minister a expresa dilanti e sindicatonan cu e ta hopi contento di mira cu Minister Glenbert Croes tin su ekipo institui pa haci esaki y ta pidi e sindicatonan pa e ekipo aki ta e prome punto di contacto y e Ministernan lo wordo envolvi ora cu ta necesario y of ora cu tin conflicto cu por wordo escala.

 

Gabinete Wever-Croes no solamente kier implementa e plataforma di dialogo tripartiet pero kier ancra esaki den ley tambe pa garantisa continuidad di e dialogo. Prome cu tuma e paso aki, lo mester tin un periodo pa wak si un dialogo asina ta funciona. Ora cu e wordo ancra den ley, tur minister mester tene nan mes na dje.

 

Na final di e reunion Prome Minister a gradici e sindicatonan pa e passion cu nan ta haci nan trabou, trahando cu dinamismo apesarar cu tin biaha cosnan ta mustra menos bon y duro, nan ta continua pasobra nan ta para pa loke nan ta kere den dje. Esaki, pa Prome Minister ta trece un trankilidad den dje sabiendo e ora cu e trahadornan ta bon representa.