Home » Parlamentario Sue-Ann Ras: ‘Probecha di e oportunidad di estudio HBO den Cuido Social mediante Social Crisis Plan’

Parlamentario Sue-Ann Ras: ‘Probecha di e oportunidad di estudio HBO den Cuido Social mediante Social Crisis Plan’

by Admin
0 comment 73 views

E necesidad pa Aruba tin mas personal den nivel di HBO den e sector di enfermeria di cuido social ta grandi. Esaki tabata un di e tantisimo puntonan di urgencia y accion den e Social Crisis Plan di Gabinete Wever Croes. “Ta di aplaudi e paso grandi aki cu Minister di Salubridad, Dangui Oduber, a tuma, pa crea oportunidad na nos hendenan den sector di enfermeria di nivel 4, pa nan haci nan estudio di HBO (bachelor) den “Maatschappelijk Gezondheidszorg” (MGZ), cu ta un area di sumo importancia pa desaroyo di nos hendenan riba nos pais”, Parlamentario Sue-Ann Ras a cuminsa bisa.

FONDO SOCIAL CRISIS PLAN
Cu un inversion di 200 mil florin di e fondo di Social Crisis Plan di Gobierno di Aruba, Departamento Sociaal Psychiatrico, hunto cu Departamento di Salud Publico y Instituto pa Formacion den Enfermeria (IFE Curacao) lo cuminsa cu e estudio di “Maatschappelijk Gezondheidszorg” aki na Aruba. “Un di e obstaculonan cu nos a encontra, debi na tanto aña di descuido y interes den sector social, ta e oportunidad di profesionalisacion di nos propio hendenan, pa asina structuralmente atende tur e problematica cu nos tin den cuido social, specialmente riba e tereno di cuido den adiccion y psikiatria” Ras a indica.

KEN POR SOLICITA?
Segun Ras: “Nos sa cu tin varios interes den e estudio aki y nos ta haci un peticion na tur esunnan cu ta enfermero nivel 4 y tin experiencia di minimo 2 aña, pa solicita pa tuma parti na e estudio aki cu tin un duracion di dos aña y mey”. E enfasis ta poni riba e enfermeronan cu ta trahando riba tereno di hubentud y tur esunnan cu ta trahando na Departamento di Salud Publico, Hospital, Wit Gele Kruis, SVGA, Centro Medico, FMAA y KIA. E inscripcion ya ta habri y tin cupo pa solamente 20 enfermero y si tin mester di mas informacion, por tuma contacto libremente cu sr. Rafael S. Lopez, coordinador di e proyecto aki pa IFE-Aruba, na telefon 5928170.

ESTUDIO
E duracion di e estudio ta di dos aña y mey, di cual e prome aña ta enfoca riba e parti general y den e di dos aña, lo partie den dos seccion: Cuido di Salud General y Cuido di Salud Mental. “Importante ta, cu lo pone extra atencion na e seccion hubenil, cu sigur ta uno di sumo importancia, mirando cu e cantidad di hoben awendia, cu tin mester di cuido di salud mental profesional, a aumenta y esaki no ta un secreto. Nos mester ta habri pa papia di e topico aki y brinda nos hobennan tur oportunidad pa haya e guia profesional necesario,” Ras a enfatisa. Peticion ta bay na tur esunnan cu a yega di registra den pasado caba, pa tuma contacto tambe cu sr. Rafael S. Lopez, pa confirma si nan tin interes pa participa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio