Home » Parlamentario Mike de Meza Gobierno ta mustra di tin draaiboek pa evita reapertura di refineria di San Nicolas

Parlamentario Mike de Meza Gobierno ta mustra di tin draaiboek pa evita reapertura di refineria di San Nicolas

by Admin
0 comment 50 views

 

 

Gabinete Wever Croes manera semper tabata custumber di partido MEP, ta di traha draaiboek ora cu nan kier logra algo cu ta na interes solamente di e partido y su politiconan y no di pueblo.

Draaiboek ta un palabra cu semper MEP a uza y un biaha mas por bisa cu tin un draaiboek pa algun luna caba, contra di reapertura di refineria di San Nicolas, segun miembro di fraccion di AVP, ing Mike de Meza.

Segun de Meza ta conoci cu dos partner (partidonan POR y RED) den coalicion cu partido MEP no ta sostene e reapertura di e refineria y a vocifera esaki publicamente na diferente ocasion tambe. Asina ta cu pa algun tempo caba tur hende por a mira diferente actonan tuma luga contra interes di e refineria su reapertura y con gobierno di MEPORED no ta haciendo esfuerso algun pa trata di realisa e proyecto aki cu sin duda lo ta un boost enorma pa economia di e pais y pa e pueblo di San Nicolas.

“Constantemente pa mas di un aña caba por a constata un serie di publicacion tumando luga den varios medio di comunicacion, traha pa profetanan di desaster, kendenan ta mucha manda di un grupo cu tin otro interesnan ta hungando un rol den henter e asunto aki.

Tin un schedule traha pa manda noticianan negativo relaciona cu e refineria y CITGO pa casi un aña caba, caminda sistematicamente ta pone e proyecto aki den un lus negativo dunando e impresion cu ta preparando un plan pa un biaha mas un gobierno di MEP cera e refineria di San Nicolas.

Cu tin desaroyonan no mucho alentado a tuma luga cu e compania di CITGO Venezolano ta un hecho pero nos no ta mira cu gabinete Wever Croes ta haciendo un esfuerso necesario pa traha hunto cu e partidonan envolvi, pa trata di atende e desaroyonan aki y mira con ta sigui cu e proyecto aki, cu sin duda lo percura pa un miho desaroyo economico tanto pa Aruba como e bario di San Nicolas.

Recientemente por a lesa cu na Corsou sindicatonan hunto cu gobierno, ta trahando duro pa atende cu un situacion similar cu e refineria di PDVSA na e isla aki y siman pasa  keda publica informacionnan positivo caminda ta papia di un proposicion pa prolonga e contract cu PDVSA y ta mustra cu Venezuela ta dispuesto pa haci esaki.

 

Sinembargo aki na Aruba nos tin un gobierno y su prome minister cu pa algun tempo caba no kier a sinta na mesa cu representantenan di CITGO pa mira kico gobierno por haci pa haya un salida adecuado cu ayudo di gobierno Hulandes, pa logra e proyecto importante aki. Claramente esaki ta un falta di interes y/of un incapacidad di promer minister y alabes minister di energia Evelyn Wever-Croes y e minister di labor Glenbert Croes.

Un gobierno di Aruba cu no ta mira of no kier compronde e importancia di un reapertura di e refineria di San Nicolas aki pero ta mustra mas tanto cu ya tin gruponan liga na e gobierno aki, cu kier saba probecha di un eventual fracaso di e proyecto aki, no na interes di pueblo of Aruba, pero pa sirbi interes di e gruponan aki.

Ya caba ta conoci cu tin discusion entre varios grupo liga na e gobierno aki pa pone man riba e compania FSMA cu ta un empresa di gobierno y kier pone man riba esaki pa saca probecho grandi di esaki y laga pueblo un banda.

Nos ta contento di mira declaracion di e Director di RdA kende a mustra recientemente riba e importancia di e refineria aki tanto pa Aruba como pa CITGO cu kier mira e refineria aki wordo habri ya cu e lo sirbi interes grandi e ambos pais economicamente.

Sinembargo e falta di seriedad, e falta di capacidad di un gobierno cu ta pensa solamente riba su mes y nan famia- y amigonan, ta e mayor obstaculo y e peliger grandi pa completa e reapertura di e refineria aki.

Gobierno di AVP a haci un esfuerso pa añanan largo pa percura pa logra habri e refineria di San Nicolas cu gobierno di MEP a permiti cera su portanan y por a mira diferente lucha den seno di partido MEP riba e refineria aki, ya cu ta mesun prome minister kende a elogia Glenbert Croes pa su supuesto “esfuerso” na Venezuela pa logra cu e proyecto di reapertura a inicia, no ta mustra mucho interes pa atende cu e proyecto imporante aki.

Riba dje ta bin acerca cu Minister Glenbert Croes awendia no kier papia riba e refineria y ta dirigi tur hende cu puntra algo riba esaki, pa prome minister Evelyne Wever Croes, kende ta e minister di energia pero no ta haci esfuerso algun pa sostene e proyecto aki,” Parlamentario Mike de Meza a declara.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio