Home » Parlamentario Michael Lampe Mundo di construccion pasando den tempo dificil cu poco trabou y poco perspectiva

Parlamentario Michael Lampe Mundo di construccion pasando den tempo dificil cu poco trabou y poco perspectiva

by Admin
0 comment 44 views

 

Hopi trahado lo wordo manda cas

 

Den ultimo 13 luna mundo di construccion no ta mirando cosnan positivo tumando luga, al contrario tin masha poco proyecto grandi den pipeline pa wordo ehecuta y e tiki cu tin ta ser otorga pa companianan amigo, companianan cu a sostene partidonan den gobernacion.

Parlamentario pa fraccion di AVP, Michael Lampe ta mustra cu tin varios indicacion cu cerca companianan di construccion, cosnan no ta bayendo bon y cu no tin mucho perspectiva cu esaki lo drecha den proximo lunanan.

“Aruba tin un gobierno cu a haya un mandato for di pueblo, pa drecha e situacion di tur famia aki na Aruba, a base di promesanan cu a wordo haci durante di campaña electoral.

Sinembargo ya pueblo a ripara caba cu tur e promesanan aki a resulta den un schema falso, simplemente pa haya e poder pa goberna e pais pero sin cu a tuma consideracion cu nos pueblo.

Na luga di trece solucion sin medida, gabinete Wever Croes a introduci solucion cu hopi medida, sinembargo sin cu e medidanan aki ta un solucion pa pueblo, al contrario e medidanan aki a bin ta rancando placa y mas placa for di cartera di pueblo sin duda bek algo a cambio.

Aruba ta den un recesion pa casi un aña caba, loke a wordo confirma pa cifranan di Banco Central y tambe di CBS y esaki ta wordo sinti riba tur nivel di comunidad.

Ya caba e inflacion ocasiona pa aumento di BBO y un serie di medida cu e reforma fiscal cu gobierno a pasa net prome cu Pasco, a crea un situacion sumamente delicado, caminda sector comercial como esun di construccion, ta para dilanti dilemnanan grandi y dificil.

Den construccion e unico actividad cu ta tumando luga na e momentonan aki, ta proyectonan di gobierno di AVP cu ta den ehecucion ainda, manera expansion di Dr Horacion Oduber Hospitaal, proyecto di Watty Vos Boulevard y awor inicio di e ‘boardwalk’ cu ta bay cuminsa na Malmok y cu ta otro proyecto di gobierno di AVP.

Durante tratamento di presupuesto 2019 no por a tuma nota di ningun proyecto di gobierno mes, mientras cu durante ocho aña largo di gabinete Mike Eman I y II, e gobierno aki tabata e inversionista di mas grandi cu a percura pa economia di e pais sigui draai.

Awor pa falta di vision y falta di capacidad, tin un gobierno cu ta determina pa regla tur cos, tur pero tur cos, cu implementacion di medidanan contra pueblo, ranca placa na unda cu por sin ta percura pa e trankilidad y prosperidad cu tanto nan a priminti.

Mundo di construccion lo bay conoce retironan di cantidad di trahado ya cu simplemente no tin mucho cos tumando luga ya cu tur hende ta sperando kico gobierno mes ta bay haci y si e situacion economico actual, lo conoce un cambio den proximo lunanan.

No tin perspectiva positivo na e momentonan aki pa companianan di construccion y ya caba hopi trahado ta trahando a base di orarionan reduci, segun tin trabou nan ta wordo yama y mesun grupo aki lo ta prome riba lista di retiro ora cu e momento aki yega.

Ya caba ta sperando un serie di retiro tambe den e sector comercial caminda e impacto crea pa e reforma fiscal di gobierno  y aumento di BBO, a pone cu hopi compania grandi importado di productonan, ta mira nan benta riba mercado local cay den un forma desproporsional y nan no ta mira cu esaki lo bay cambia den futuro cercano.

Al contrario despues cu Minister Presidente a anuncia dos otro pakete di medida cu su reforma fiscal, nan ta anticipando cu e situacion lo bira  algo hopi serio mes y trahadonan lo ta e prome nan cu lo bira victima di e situacion aki crea pa gobierno,” Parlamentario Michael Lampe a declara.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio