Shaba/Oranjestad:Dialuna den oranan di mainta, personal di CEA a busca e turista Mericano, cu ta cera na Warda di Shaba, kende ta wordo sospecha di a viola un dama turista Canades. Manera ta e proceso legal e sospechoso mester a presenta dilanti Huez Comisario.
E caso aki ta bou di investigacion pa Jeugd en Zeden Politie . E caso di violacion aki a tuma lugar Diabierna den oranan di marduga riba e beach di Hilton Beach Resort y e sospechoso aki a keda deteni diabierna den oranan di atardi pa anochi.
Recherchenan despues di a tuma declaracion di e victima lo a tuma declaracion di e sospechoso tambe. Segun nos a compronde cu ambos turista tabata hunto den un nightclub, prome cu e violacion a tuma lugar.
E homber sospechoso tabata hospedando na un hotel, mientras e victima tabata hospedando na un apartamento. Tur esaki lo tene cuenta cune tambe, loke ta hunga un rol importante ta con e sospechoso a laga su victima despues di lo a viol’e. Ela laga su victima bandona atras riba beach.
For di e investigacionnan lo mester sali na cla si e sospechoso enberdad a forsa e dama pa tene relacion sexual of tambe si ela probecha di su victima paso e tabata bou influencia.
Tambe autoridad lo mester investiga si e victima y sospechoso ta papiando berdad, tin varios detaye cu ta importante den un investigacion. Un cos ta confirma cu dos turista a topa den un nightclub, e dama Canades na momento cu nan a sali e tabata acompaña pa un amiga, pero durante e trip nan no a sigui hunto, e amiga no tin nada di haber cu e caso aki.