L.G.Smith Boulevard – Diadomingo marduga 5’or pasa polis y ambulance a wordo manda cu urgencia na e brug di Wilhelmina Park.
Eynan un accidente serio a sosode entre un brommer cu auto.
Na yegada ariba e brug nan ta topa cu un Toyota Yaris color cora cu por a mira cu a bay bira ba su man robes, pa drenta e caya pabou di cas di Gobernador.
Ariba acera di e brug un Harley Davidson benta, y ariba caminda na rand di acera e conocido motociclista Chuple.
Chuple a resulta seriamente herida na su pia links altura di su enkel.
Loke a sosode
Na e sitio nos a compronde cu e chauffeur di e Yaris cu tawata bou influencia a yega bira ariba Chuple, cu tawata bayendo direccion pabou.
E impacto di e auto tawata tur contra e parti abou di pia di Chuple, causando un trauma serio na su pia y lagando e herida benta ariba caminda.
Chauffeur di e Yaris a keda deteni y transporta pa warda, y cu cargonan serio den su contra.
Departamento tecnico di polis a ser pidi na e sitio, mirando cu e motociclista ta seriamente herida. Pues e specialista mester yega y tuma algun shots pa e investigacion.
Cu urgencia e motociclista a wordo hiba Hospital, unda e lo mester a wordo pasa mesora pa camber di operacion mirando e daño serio na e pia.