Belgiëstraat – Diasabra atardi informacion a drenta di un problema grandi un biaha mas ariba veld di River Plate, situa na Belgiëstraat.
Segun prome informacionnan, dos grupo grandi lo ta bringando of ta bay bringa cu otro, y tambe tin arma envolvi.
Unidadnan policial cu a cuminsa bay e veld a wordo avisa pa bay cu cautela.
Na yegada, manera den mayoria caso, esnan cu tawata bringa of kier a bringa a move. Posiblemente door cu a tende cu varios unidad policial ta na caminda.
Loke tawata lamentabel ta cu tur esaki a pasa dilanti muchanan, cu lo mester a hunga futbol.
Algun hende presenta lo a splica mas o menos kiko a pasa, pero polisnan sa tambe cu no ta tur ora bo ta haya exactamente kiko a conduci na e problema.
Loke a pasa diasabra atardi, caminda na prome instante a papia cu lo tin arma envolvi ta pone mayornan responsabel pensa dos biaha. Esta cu bo no sa cua dia cos ta bay full for di man, y hende inocente lo por resulta herida.
Segun algun mucha na e sitio, un di e hombernan cu lo tawata envolvi den e problema no ta biba mucho leu di e veld.
Despues cu e cuatro unidadnan a constata cu e situacion ta bou control nan a bandona e veld.
Kiko ta of tawata e problema no ta conoci.
Algun dia atras durante un wega di futbol cos a hera bay full for di man, y mester a pidi varios patruya pa presenta y pone ordo.