Gobierno di Aruba a wordo notifica cu Venezuela ta bay tin ehercicionan militar entrante awe 10 di februari te dia 15 di februari. E ehercicionan aki ta forma parti di e conmemoracion di e 200 añanan di e ‘Congreso de Angostura’ cu ta origina di e prome Constitucion di e pais Venezuela.
Prome Minister Evelyn Wever-Croes: “Esaki ta algo planifica caba relaciona cu e echo historico aki y nos a wordo notifica door di autoridadnan siman pasa pa tene cuenta cu esaki. E serie di entrenamentonan aki ta encera ehercicionan riba awa tambe. Nan lo keda dentro di e teritorio Venezolano pa cua motibo tambe NO tin motibo pa panico”.
E situacion den Venezuela como tambe e posicion di Reino ta keda mescos despues di e anuncio di siman pasa unda cu e Minister di Relacionnan Exterior Hulandes señor Stef Blok a manda un carta pa Parlamento Hulandes, indicando cu Hulanda ta reconoce señor Juan Guaido como e Presidente Interino di Venezuela pa e periodo cu e tin mester pa organisa eleccionnan liber na Venezuela. Den e carta aki, Hulanda ta splica su punto di bista y e posicion di Reino, cu lo mantene e relacion diplomatico cu e regimen di Presidente Nicolas Maduro cu tin e autoridad real mientras tambe lo cuminsa cera contactonan diplomatico cu esnan di Juan Guaido.
Prome Minister e enfatisa cu Gobierno y tur e expertonan concerni ta sigui e desaroyonan di cerca tur dia y tur e instancianan aki pa hopi tempo caba a bin ta prepara riba e tema aki pa asina wordo informa a base di informacion veridico y pa tuma accion riba informacionnan veridico y no riba informacionnan cu no ta corecto. Aparte di esaki, segun Prome Minister, hunto cu Marina Real, autoridadnan local tanto maritimo como riba tera y cu cooperacion estrecho cu Corsou y Boneiro ta atende cu e tema aki debidamente y asina duna informacion tambe.
E conseho di biahe pa Venezuela tambe a keda mescos. NO biaha pa Venezuela si realmente no ta necesario. Gobierno di Aruba ta vigila e desaroyonan di cerca y lo duna mas informacion si y ora ta necesario.