Parlamentario Endy Croes ta splica cu miembronan di Raad van Toezicht di Fundacion Lotto pa Deporte ta ilegal. No obstante cu nan ta un grupo sinberguensa y sin gevoel y pronto cada un lo mester para responsabel pa actonan di Distefano Wernet nos por a tuma nota di un artikel den Statuut di e Fundacion cual ta impedi pa un persona por sinta mas cu 2 termino como miembro di e Raad van Toezicht (antes Bestuur di Lotto).
Artikel 9 den e Statuutnan cu nan mes a cambia ta splica cu un miembro ta sinta pa un periodo di 4 aña y ta ‘eenmaal hernoembaar’. Pues despues di sinta 4 aña nan por sinta un di dos periodo di 4 aña y no mas cu esaki. E Clan di AVP Eli Kock, Vinda Da Sousa (casa di Desiree Croes), Antonius Kamperveen (taxista amigo di Mike Eman), Flavio Faneyte (Staf di Elmar y amigo intimo di Benny Sevinger), Silvio Janga “pell” di Mike De Meza tur ta sinta desde 23 november 2009 den Bestuur y pues tur ta sinta mas cu 8 aña. No obstante cu bo a core cambia Statuut net despues di eleccion ta dunabo derecho pa keda masacra Lotto.
Netamente por tuma nota di un set di persona sin gevoel, sin sentido comun, sin dignidad y sin honor kendenan ta manipulando un sistema gastando masha hopi placa di Deporte na amigonan abogado pa keda haci todo por todo pa keda sinta.
Adhunto ta publica awe e artikel 9 di e ultimo version di Statuut di Lotto. Enbes pa duna deportistanan e placa ta sinta malgasta y “parandia” cu placa di Lotto. Alrespecto “parandia” nos lo bin cu un otro articulo pronto pa informa pueblo con e Directeur kende actualmente ta riba schorsing tabata parandia cu placa di Lotto entre otro na San Nicolas. Tur esaki cu consentimento di Raad van Toezicht.
Ora cero ta yegando y pueblo mester por sa tur detaye pa asina huzga e amigonan di AVP . No por ta asina cu un grupito kier haci doño di Lotto y no ta duna ningun cuenta na Staten, tampoco na Minister di Deporte. Parlamentario Croes a splica di no lo sosega te ora mira fondonan di Lotto lo cuminsa yega na deportistanan bek manera mester ta. E proceso aki ta uno largo pero nos tin e confiansa cu na final Bondad lo vence Maldad.