San Nicolas – Diasabra merdia polis a bay New Food Center pa un muhe cu a yega di horta varios biaha den e supermarket aki, y diasabra merdia manera nada un pasa e ta eyden atrobe ta “shop”.
E doño of esnan responsabel pa e cameranan di siguridad tawata monitor e biaha aki.
Kere of no, un biaha mas e muhe aki ta horta.
Doñonan a warda polis yega pa atende cune.
Na yegada di polis, nan a controla cosnan cu e tawata tin y ta bin haya productonan cu e no a paga pa nan den su poder.
Ey mes nan a detene.
Segun e doño dialuna cu a pasa ela horta fruta. Un otro biaha ela horta deodorante y algun cos mas.
Parse cu e muhe aki ta biba na Noord y ta bay te pariba di brug pa horta, aunke nos no por a confirma esaki si ta asina.
Loke a hala nos atencion ta cu, e muhe aki tin un auto basta caro ta core indicando cu financieramente e no ta di e malo ey.
Posiblemente e por ta un enfermedad cu yama Kleptomania, esta cu e ta haya e impulso of necesidad pa horta. Den Psikiatria e ta wordo yama Impulse Control Disorder.
Ban spera famia por busca un ayudo profesional pe, esta si ta trata di un problema psikiatrico.