Juancho Irausquin Boulevard, Eagle Beach: Diasabra mainta Polis di trafico mester a bay na e negoshi na Ponton caminda den oranan di marduga chauffeur di un Pickup S10 A 18969 a causa dañonan material na e porta di entrada di un negoshi na Ponton.
Na e negoshi e polis a papia cu e doño di e negoshi, kende a duna polis basta informacion importa cu polis tabata tin mester pa por pone man riba e anti social cu a core pa su responsabilidad.
Aparentemente e auto ta registra na un adres na Palm Beach. Un testigo tambe a presenta na e negoshi y a duna nomber di e chauffeur cu a hit and run y tambe unda e anti social aki ta trahando.
Polis di trafico mesora a bay na e construccion di Condominium riba Juancho Irausquin Boulevard, caminda e chauffeur ta traha. Na e sitio nan a bin topa enberdad cu e Pickup S10 preto cu nan tabata buscando.
E polisnan a subi riba e tereno y a cuminsa busca e chauffeur, ora nan a topa cune ela cuminsa na nenga cu ta e hit and run. E no kier a acepta cu e tabata e chauffeur di e pickup cu den oranan di marduga a comete hopi destrucion na e porta di e negoshi, na Ponton.
Polis no a sigui perde tempo cu ne pero a dicidi mesora di confisca e pickup, lagando e chauffeur na pia. Polisnan di trafico lo bay haci un investigacion riba e auto y asina por confirma cu e pickup aki tabata esun envolvi den e hit an run na Ponton.
Na e sitio wardando riba takelwagen mes e polis a mira algun marca riba e pickup confirmando cu ta e pickup aki mes tabata envolvi den e hit and run na Ponton.