ORANJESTAD, Aruba: Pa Maart 2019 Departamento Sociaal Psychiatrico, hunto cu Departamento di Salud Publico, den cooperacion cu Crisis Plan Social di Gobierno di Aruba y Instituto pa Formacion den Enfermeria (IFE Curacao) lo cuminsa cu e estudio di “Maatschappelijk Gezondheidszorg” aki na Aruba.
Mirando e necesidad pa mas enfermeronan riba e tereno di cuido social na nivel halto di educacion, a dicidi di cuminsa e estudio aki pa di dos biaha na Aruba.
En principio tur enfermero nivel 4, cu minimo dos aña di experencia por tuma parti na e estudio aki. Aunke e enfasis lo wordo poni na e enfermeronan trahando cu hubentud y esnan trahando na Departamento di Salud Publico, Hospital, Wit Gele Kruis, SVGA, Centro Medico, FMAA y KIA.
E estudio tin un duracion di dos aña y mei. E prome aña lo ta general y e di dos aña lo wordo parti den dos seccion, cu ta “Cuido di Salud General” y “Cuido di Salud Mental”, cu extra attencion pa seccion hubenil. E ultimo mita aña lo ta general. Inscripcion ta habri y tin cupo pa solamente 20 participante.
Ta pidi esnan cu a registra caba den pasado pa tuma contacto pa sa si nan ta participa ainda.
Pa mas informacion interesadonan por tuma contacto cu sr. Rafael S. Lopez, coordinador di e proyecto aki pa IFE-Aruba, na telefon 5928170.
