Hospital y Zuyd Hogeschool trahando hunto pa ofrece mas oportunidad
Recientemente, representantenan di Zuyd Hogeschool di Hulanda a bishita Dr. Horacio E. Oduber Hospital un biaha mas, pa reuni pa trata loke ta fase dos di trece opleiding di enfermeria riba nivel di HBO pa Aruba. E impacto aki lo ta uno hopi grandi pa Hospital y ta preparando bon, combersando cu tur stakeholders. E esfuerso ta uno conhunto, cu ta inclui hasta e ministernan cu ta compaña Hospital den e trayecto aki.
Tin hopi entusiasmo, pero tambe tin hopi trabou pa ehecuta, asina Director di Cuido di Hospital, sr. Ezzard Cilié, a duna di conoce. Ta purba planea tur cos na un forma responsabel y pa bin cu algo concreto. Ta un responsabilidad como director pa bin cu un base solido unda ta ofrece oportunidad pa crece pa tur empleado. E proyecto aki tin 2 componente importante pa tene cuenta cune cu ta den Hospital tin varios nurse gradua cu kier sigui crece den nan trabou y tin esunnan cu no conoce e profesion aki, mester mir’e como uno atractivo.
E ta un oportunidad cu por brinda hobennan Arubiano cu ainda no a scoge kico nan kier studia. Un oportunidad pa sigui studia na Aruba mes en bes di bay Hulanda. Hospital kier crea un ambiente cu ta atrae studiantenan dispuesto pa forma un carera den ramo di enfermeria. Ya caba Colegio EPI ta yuda Hospital cu e parti teoretico y awor lo por combina cu practica den Hospital mes, asina Ezzard Cilié a duna di conoce. Na momento cu ta asina leu, e studiantenan mes lo tin oportunidad pa scoge, sea pa cuminsa traha mesora of pa sigui studia.
Loke a ripara ta cu studiantenan ta bay afo y nan ta keda biba eynan, pasobra eynan lo por tin hopi mas pa ofrece. Pa por mantene nan na Aruba, mester por ofrece oportunidad na cas mes. Hospital ta spera di trece un cambio den esaki y ofrece studiantenan cu kier algo mas localmente, estudionan amplio di nivel halto comparabel cu Hulanda. Ta trahando pa basta tempo riba e proyecto aki y ta spera cu pronto por duna mas detaye y fecha cu lo por start.
E cooperacion entre Hospital y Zuyd Hogeschool ta bayendo bon, sr. Ruud Heijnen, coordinador di cooperacion internacional di e Facultad “Gezondheidszorg” na Zuyd Hogeschool, a duna di conoce. Door di e trahamento cu Hospital, Zuyd Hogeschool ta haya hopi contact cu tur instancia di cuido riba nos isla. Esey ta duna e scol un miho vision riba e retonan, mientras cu di otro banda ta conoce tur stakeholder den salubridad.
Barth Koster, manager di Academia di Hospital, a reuni cu Zuyd Hogeschool riba e programa di orientacion. Nan ta positivo cu Zuyd Hogeschool lo apoya esaki hunto cu Universidad di Aruba. Como cu kier cuminsa un nivel di HBO, mester siña con pa implement’e den e organisacion y integra esaki riba tur tereno necesario. Esaki lo ta un di e retonan grandi. HOH Academy lo ta e departamento cu ta encarga y ta brinda sosten na e practica den enfermeria.
E bishita di Zuyd Hogeschool tabata uno fructifero resultando den un base solido den futuro pa nos hobennan y otro cu kier sigui studia den enfermeria aki na Aruba mes.