Aruba Caiso & Soca Monarch 2019 a cuminsa dialuna y ta bayendo segun expectativa di Stichting Musica. Tur atardi e organisacion ta tene un briefing cu e team di produccion, seguridad y demas stakeholders y tambe ta mantene comunicacion estrecho cu e main partners di e festival, pa scucha cualkier deseo y sugerencia cu por tin di nan parti.
Stichting Musica a evalua e aspecto di stoel cautelosamente y awor por a logra na acuerdo cu KPA pa permiti pa publico drenta Aruba Entertainment & Carnival Village cu stoel di panja/tela (asina yama “beach chairs”). Desde principio e intencion di Stichting Musica tabata pa por duna bek na nos grandinan y esnan cu limitacion den forma di un seating area safe y comfortable. E seating area tabata bon bishita durante e prome dos dianan di festival, sinembargo e evaluacion a dirigi cu Stichting Musica hunto nos stakeholders y KPA na lo siguiente.
Desde diaranson, 6 di februari, publico por drenta e festival cu nan propio stoel di tela. E organisacion ta pidi cooperacion di publico, pa por sinta di un forma cu ta laga espacio dilanti stage pa asina publico y fanaticada di e cantante y bandanan por apoya nan artista di cerca. Entrada cu stoel ta riba risico propio.
Stichting Musica ta spera cu Aruba henter lo aprecia e esfuerzo di Stichting Musica pa sigi engrandece nos festival cultural di mas grandi.
Na mes momento, Stichting Musica ta anuncia cu desde diabierna, 8 di februari lo tin kaarchi pa e Super Saturday na benta. Tickets pa e anochi final di e festival lo ta disponible na 50 florin prebenta y 60 florin na porta y lo ta obtenibel na Citgo Boulevard, Palm Beach, Sta. Cruz, Ponton y Essoville.