Diamars atardi Minister di Turismo sr. Dangui Oduber hunto cu colega Minister sr. Otmar Oduber y CVC Construction & Management a firma acuerdo pa cuminsa cu e proyecto di “Boardwalk Malmok”. E Minister ta anuncia cu trabounan pa e prome fase di “Boardwalk Malmok” lo cuminsa dentro di 2 siman. E proyecto aki ta wordo financia pa Tourism Product Enhancement Fund (TPEF) y ta bay wordo supervisa pa e departamento di D.O.W.
E prome fase di e proyecto lo bay tin un duracion di 115 dia di trabou, e trabounan lo tuma lugar di e crusada pa bay Arashi te cu dilanti di Malmok 747. E prome fase lo consisti di 240 meter di “hard hout”, lo haci uzo di klinkers tambe. Lo pone palo cu reflectors cu ta separa trafico di peatonnan y asina trece e seguridad na esnan cu ta haci uzo di e area aki pa cana of haci ehercicio. Tambe lo bin area di parkeo y loke nan ta yama e muraya di turtuga.
Segun Minister Dangui Oduber e proyecto aki ta uno necesario pa duna e area di Malmok un “upgrading” y trece seguridad na tur e personanan cu ta cana y haci ciclismo den e area aki. Esaki ta un otro promesa haci y un promesa cumpli.
