Diamars mainta gobierno di Aruba a ricibi sr. Francisco “Fico” Vrolijk na cocolishi. Aki sr. Vrolijk a haci entrega di su buki titula “Historia di Futbol di Aruba” na conseho di minister.
A dura sr. Vrolijk 20 aña pa por a acumula tur e informacion atraves di entrevistanan tanto na aruba, Curacao y Colombia pa realisa e buki aki. E buki ta conta e historia di futbol di aña 1909 pa aña 1959, den e epoca eynan no tabata tin articulonan di corrant pues entrevistanan tabata esencial den trahamento di e buki. Awor cu a completa e prome parti di e buki lo bay continua cu e segundo parti, e segundo parti lo conta e historia di aña 1960 pa aña 2010.
Minister di Deporte sr. Dangui Oduber ta gradici y aplaudi sr. Vrolijk pa tur locual e la haci pa mantene e historia y e cultura di e deporte di futbol bibo atraves di su buki. Danki pa e 50 aña di historia di futbol.