ORANJESTAD – Durante e Manifestacion Cultural riba Plaza dedica na Betico Croes, nos pintor local Elvis Tromp a expresa su talento pintando un potret di nos Libertador. E obra artistico aki a keda inspira y pinta memei di tur e espectaculo cu tabata tumando lugar riba tarima. Segun e pintor Elvis Tromp, e obra ta un inspiracion caminda por aprecia un pintura di Betico, como tambe e paloma di Libertad cu 4 cinta den su piek cu ta simbolisa e.o. logronan di Betico, nos Himno, nos Bandera, nos Ortografia, nos Moneda. Betico a logra uni e pueblo y asina nos a logra haya nos Status Aparte cu ta nos libertad. Nos como pueblo mester cuide y conserve!
Minister Sra. Xiomara Ruiz-Maduro ta gradici nos pintor Elvis Tromp pa e obra inspirativo aki cu nos ta spera pronto por keda exhibi den un museo dedica na nos Libertador su bida y su legado.
