Parlamentario Endy Croes: MP Evelyn Wever Croes a firma e Convenio di Savaneta. Aplauso na e forma con Promer Ministernan di Aruba, Curacao y St Maarten ta bini hunto pa bienestar di tur e islanan

Parlamentario Endy Croes a splica di ta contento di mira con e relacion entre e islanan ta canando. Diahuebs siman pasa Parlamentario Endy Croes tabata presente na e ocasion unda e tres (3) Prome Ministernan respectivamente Evelyn Wever Croes (Aruba), Eugene Rhuggenaath (Curacao) y Leona Marlin (St Maarten) a logra yega na un consenso firmando e asina yama “Convenio di Savaneta”. No obstante e tres Promer Ministernan di e islanan a reuni riba diferente tema comun di cooperacion y a oficialisa esakinan den e Convenio di Savaneta,  alaves e 3 Ministernan di Finansa, Xiomara Ruiz Maduro (Aruba), Kenneth Gijsbertha (Curacao) y Perry Geerlings (St Maarten) cu nan respectivo conseheronan tambe a reuni riba e aspectonan financiero. Parlamentario Endy Croes ta splica di ta trata di diferente puntonan di cooperacion mutuo na bienestar di e islanan. Parlamentario Endy Croes tambe a logra combersa finalmente cu ambos Promer Minister tanto di Corsou como Sint Maarten kendenan tabata sumamente contento. A keda palabra cu alrededor di cada 6 luna lo bini bek hunto pa asina midi e progresonan di e Convenio di Savaneta y agrega cooperacionnan nobo dado caso esaki ta necesario. Parlamentario Endy Croes como Presidente di Comision Fiho di Deporte y Cultura ta mira esaki alaves como e “brug” pa crea oportunidad tambe den futuro cercano pa pone riba agenda intercambionan deportivo entre e islanan na un manera structura cu stimulacionan necesario di tur tres gobierno pa logra e meta final. Pabien na Prome Minister Evelyn Wever Croes cu e logro aki y sigur palabra di pabien na tur cu a participa den e cumbre aki kendenan a haci esaki un cumbre exitoso.