Parlamentario Endy Croes a splica cu pa mas cu un aña caba tin weganan politico a tuma lugar den Lotto pa Deporte. Manera ta conoci den luna di october 2017 – net despues di eleccion – cu cooperacion di professor Kunneman y un notario Lotto a cambia su statutonan. Cu e cambionan aki e Directiva, esta e Bestuur nombra pa AVP a permiti nan mes e luho pa keda sinta y no respeta Minister su peticion pa nan retira. Lamentablemente Hues a bay di acuerdo cu esaki den kortgeding mientras 19 di februari proximo lo bay tin un decision den e bodemprocedure cual a wordo encamina alrespecto e caso aki.
Atracadornan di Lotto
Hendenan manera Benvinda Da Sousa – casa di Desiree Croes riba lista di AVP, Antonius Kamperveen – amigo di Mike Eman sin ningun estudio, Silvio Janga – amigo di Mike De Meza – tambe culpabel pa basta fechoria cu lo bay mira luz di dia, Flavio Faneyte – Staf den Elmar, Eli Kock – ex pelotero di Marlboro hunto cu Di Stefano Wernet ta esnan cu a wordo nombra pa AVP desde 2009 y a bay over pa cambia statutonan pa keda manera bison kit sinta riba e stoel boicotiando asina e vision di minister di deporte nobo pa asina haya tempo pa sconde bastante barbaridad cu nan a comete. Boso wak boso cara den spiel y puntra boso mes si boso ta haciendo lo corecto? Tin pruebanan awor con por ehempel Di Stefano Wernet ta paga su mes mas di 8000 pa luna pa haci trabao di administratie banda di ta cobrando como board member tur e temponan aya. Silvio Janga ta firma e chequenan aki wowo cera y otro nan tabata haci transferencia pa nan mesun negoshi cu placa di Lotto.
Investigacion di atraconan
Parlamentario Endy Croes, Presidente di comision fiho di deporte y cultura den Parlamento a yama un reunion 24 di januari ultimo unda e comision a bay di acuerdo pa encarga Algemene Rekenkamer Aruba (ARA) pa drenta Lotto y haci un investigacion desde 2010 pa awor na efectividad (doelmatigheid) con a gasta of malgasta placa di nos deportistanan. Despues a continua un reunion den sala grandi di Parlamento unda Parlamento “UNANIMAMENTE” a expresa e deseo pa cita ARA pa un reunion pa inicia dicho proceso. Pa cu esaki Diamars awor 5 di februari pa 1’or pm e reunion cu ARA lo tuma lugar den sala principal di Parlamento unda lo bay determina e strategia y e manera cu ARA lo bay encarga su mes pa cu e investigacion aki. Den art. 31 di e Landsverorderning di ARA ta ancra hopi cla cu STATEN como e organo mas halto por encarga ARA cu tipo di investigacionnan asina. Mientras ta keda tambe en espera di un decision di HUES riba e caso pa cu e miembronan di directiva. Staten a cuminsa move pa asina salba Lotto for di e atracadornan “legal” kendenan actualmente ta abusando di dicho Fundacion.
Parlamentario Endy Croes ta splica cu solamente kier logra cu placa di deporte realmente ta yega bek na nos deportistanan y trece claridad pa pueblo unda gran cantidad di su placa a bay. Wega a caba y e bala ta cuminsa lora!!