Desvelo di muraya dedica na tur esnan cu a duna nan contribucion musical pa trece ambiente den nos Carnaval
ORANJESTAD –Minister Sra. mr. Xiomara Ruiz-Maduro hunto cu colega Minister Sr.Otmar Oduber a haci desvelo di e mural dedica na tur e ganadornan di e festival di Calypso/Caiso y Roadmarch/Soca na locual awor ta yama Aruba Carnival & Entertainment Village na San Nicolas. E tabata bunita pa mira con emociona e musiconan presente y nan famia a reaciona ora nan a mira nan nomber, titulo di nan cancion y e aña den cual nan a gana, eternisa riba e muraya di fama aki. En total Aruba a conoce 105 Calypso/Caiso y Roadmarch/Soca Kings y tambe Queens. Un muraya especialmente pa keda recorda cada un di nan su contribucion musical pa trece ambiente den nos Carnaval.
Banda di esaki Gobierno di Aruba a brinda un reconocemento na 6 persona cu a colabora grandemente cu e festival atraves di nan apoyo y conocemento pa tene nos na altura di tur e historia y desaroyo di e festival aki den transcurso di añanan. Ta trata aki di Sr. Roberto Geerman; Sr. Hubert Naar mihor conoci como ‘Jubi’ Naar; Sr. Leonard ‘Leny’ Denz; Sr. Juan Carlos Hill; Sr. Johan Milan ‘Johnny’; Sr. Alberto ‘Brother’ Pantophlet. Tin dos persona mas cu no por tabata presente y lo wordo reconoci despues.
Minister Sra. mr. Xiomara Ruiz-Maduro Danki di curason na tur cu a haci e proyecto aki posibel cu un danki special na colega Minister Otmar Oduber cu tabata e motor pa inicia e proyecto y percura pa ela keda cla na tempo. E invitacion ta pa pueblo pasa admira e mural y sinti nos mes orguyoso di por wordo bendiciona como pais cu tanto talento artitistico local.