WILLEMSTAD: E Presidente nobo di JCI Dutch Caribbean pa aña 2019 ta bai inverti mas den liderasgo dor di enfoká riba loke “JCI a siña mi” (JCI Taught Me), “inspira akshon i kultiva kambio” (Inspire action, ignite change). Huntu ku e direktiva instalá lo sigi ekspone miembronan na diferente reto, krea diferente oportunidat pa siña i haña eksperensia den forma di entre otro treinin basá riba e nesesidat di e miembresia.
Junior Chamber International ku e filosofia di “One Year to Lead” ta enfoka pa duna hoben entre 18 i 40 aña oportunidat pa por krea kambio positivo den nos komunidat. Un di e forma nan pa krea un kambio positivo ta dor di hasi bo mes, komo miembro di e organisashon, elegibel pa forma parti di e direktiva di JCI Dutch Caribbean. E direktiva aki ta ser elegí tur aña dor di organisashonnan lokal na Kòrsou, Aruba i Boneiru. E aña aki JCI Dutch Caribbean ta konose e di 59 Presidente sr. Dupal Persaud ku ta duna guia na e organisashon huntu ku su direktiva ku ta konisiti di Sekretaria sra. Tiffany Cristina, Tesorero sra. Franchesca Louisa-Marval, Vise Presidente Ehekutivo sra. Rosetna Martinus-Mariana, Vise Presidente sr. Giovanni Eugenia, Vise Presidente sr. Guido Rojer jr., Konsehero Legal sr. Nehomar Mateo, Presidente Saliente sra. Silvetty de la Paz.
E direktiva aktual ta gradisi direktiva saliente imenso pa e trabou ku nan a hasi de aña 2018.
Presidente sr. Dupal Persaud ta enfoká riba loke JCI ta siñabo. Komo miembro di JCI bo ta traha riba bo desaroyo propio, ehekuta proyekto i bira un lider integro, aktivo pa futuro. Dor di hasi uso di “The Active Citizen Framework” bo ta transfoma obstakulo den nos komunidat kreando oportunidat pa empoderá, desaroyá i krea un kambio sostenibel.
E akshonnan di miembronan di e kaliber aki ta tradusi su mes pa medio di e organisashonnan lokal ku ta ehekuta proyektonan i trese solushonnan sostenibel den nos komunidat.
JCI ta e organisashon di liderasgo mundial di lidernan entre 18 pa 40 aña ku ta dediká na trese kambio positivo den nos komunidat.
JCI Dutch Caribbean ta konsisti di 6 organisashon lokal. Na Kòrsou tin JCI Creative Leaders in Curaçao (CLIC), JCI Involvement Of Banda Ariba Curaçao (IOBA), JCI United Citizens Of Curaçao (UC) i JCI Willemstad. Na Boneiru tin JCI Young United Bonaire (YUB) i na Aruba tin JCI Young Active Leaders Aruba (YALA).
Si abo komo individuo òf kompania ke desaroyá i kontribuí na nos komunidat, tuma kontakto ku direktiva di JCI Dutch Caribbean na [email protected].
Pa mas informashon tokante JCI, bishitá www.jci.cc, sigui nos via www.fb.com/jcidutchcaribbean; Instagram: @jcidutchcaribbean