ORANJESTAD – Recientemente a cuminsa cu e campaña di conscientisacion di e plan di crisis social, cua ta inclui publicidad den diferente medionan di prensa incluyendo, television, radio, corant y medionan social. E campaña aki ta forma parti di e plan di crisis social y ta ser ehecuta cu coordinacion y apoyo tecnico di UNICEF na Hulanda. Atrabes di un solicitud pa propuesta a scoge e miho ofertanan di e agencianan di publicidad pa un ehecucion profesional di e diferente aspectonan di e campaña.
E prome meta di e campaña ta pa crea mas conscientisacion di e crisis social cu ta existi na Aruba. Den e fase aki a opta pa haci uzo di estadisticonan y informacion real di e crisis social. E fase aki no solamente ta diseña pa trece mas conscientisacion, pero alabes stimula e comunidad pa pensa y reflecciona riba e seriedad di e crisis social y tambe pa stimula combersacion den nos comunidad, esta cu e audiencia ta keda interesa den e topico y den e informacion cu e publicidad ta trece dilanti creando tambe un sentido di urgencia riba e problematica aki.
Mester stimula e interes di e comunidad, estableciendo e sentido di responsabilidad entre e comunidad. E parti di e campaña ta dedica pa duna un sentido di corahe y solidaridad cu tur hende por forma parti di e solucion di e crisis social.
E di dos meta ta pa stimula e comunidad pa actua. Durante e parti aki di e campaña lo duna informacion di con por yuda victimanan di abuso. E meta y enfoke ta riba e responsabilidad y oportunidad cu cada uno di nos tin den nos comunidad, esta famia, colega, of amistad pa brinda ayudo na esnan cu ta confronta cu situacionnan social dificil. Idealmente kier inspira cada persona pa nan ta consciente di nan potencial pa influencia otro positivamente. Tambe kier motiva tur persona pa tuma un rol activo den yuda un ser keri y asina forma parti di e solucion. E campaña mester por stimula victimanan pa busca e ayudo pa asina por logra sali di situacionnan social dificil.
Like nos pagina di Facebook ‘Sociaal Crisisplan’ y keda na altura y bon informa di tur e proyectonan y campaña di SCP.
