Parlamentario Endy Croes ainda no por compronde con CANADIAN BANK NOTE mediante su presidente Craig Bascombe ta permiti nan mes pa mescla nan compania den asuntonan politico na Aruba. CBN ta e compania cu ta opera Lotto pa Deporte. Esaki sigur no ta wordo aprecia at all pa Gobierno ni Parlamento di Aruba. Canadian Bank Note a publica un articulo algun dia atras den matutino Awemainta di Toko Winklaar, defensor di AVP, probablemente cu su shareholders Teragroup esta Patrick Paskel y Speed. Dicho articulo cual a sali cu logo di Canadian Bank Note ta ‘misleading’ y ta un articulo incorecto.
Locuranan di CBN
Banda cu CBN a manipula informacionnan contra tanto Minister Dangui Oduber y Parlamentario Endy Croes por tuma nota cu Canadian Bank Note a bay den asuntonan interno di Lotto alrespecto un 17 Miyon cu gobierno di Aruba a aproba mediante un mocion di Staten di Aruba unda gobierno a bay over na presta Fundacion Lotto pa Deporte un suma di 17 MIYON pa construi 3 proyecto. Canadian Bank Note ta tilda cu no a usa nada di e suma aki di 17 MIYON florin pa drecha Stadion Guillermo Prospero Trinidad. Manera ta conoci cu tur dos stadion esta Frans Figaroa y Guillermo Prospero Trinidad den 2018 a wordo afgekeurd unda consecuentemente seleccion di Aruba mester a biaha pa Corsou pa hunga su partidonan cual mester a wordo hunga na cas esta na Aruba (Home Games). Pues Canadian Bank Note awor kier culpa cu no a usa placa di un prestamo haci na 2009, pa drecha un stadion cu a wordo afgekeurd na 2018. Ta con loco of leu di cas bo por ta? Craig Bascome di CBN ta compronde e materia of ta politica partidista pa AVP e kier haci?
Mal maneho di Lotto y CBN
Laga nos splica Canadian Bank Note cu e suma di 17 MIYON cu a wordo presta na 2009, ta basa riba un mocion aproba den Staten di Aruba, e organo mas halto di Pais Aruba, unda e destinacion tambe ta ancra cu esaki mester bay pa traha veldnan di Winston (Nadi Croes y Crismo Angela), veldnan na Pos Chikito y veld di futbol na Jara. Na juli 2010 gobierno di AVP a ricibi 11.5 miyon di e suma aki pa termina e proyectonan aki y pues MEP no tabata den gobierno na juli 2010. Ta bon pa Craig Bascombe y CBN compronde bon cu e prestamo aki no tabata pa drecha Stadion Guillermo Prosperidad Trinidad. Tin ademas un Landsbesluit riba e 17 MIYON aki ancra pa e 3 proyectonan ariba menciona. Anto na 2018 Stadion Guillermo Trinidad a wordo afgekeurd pa FIFA confirmando e mal maneho di fondonan door di Lotto, FFD y talves falta di vision di CBN. CBN den su articulo kier manipula y ‘mislead’ pueblo di Aruba cu publicacionnan saca for di contexto. Parlamentario Endy Croes lo tene CBN y Craig Bascombe mientras tanto responsabel pa malinforma pueblo di Aruba.
Terminando Parlamentario Endy Croes ta expresa cu e conoce CBN pa hopi aña y no por imagina ni tampoco kier kere cu CBN ta permiti su mes pa wordo usa na e manera aki pero pa awor nan ta esun responsabel te momento cu nan trece clarificacion y pidi un disculpa publicamente.