Diabierna 1 di februari a tuma luga e lansamento di e Website di FUTURA. Na e ocacion aki, Prome Minister Evelyn Wever-Croes a entrega un bunita discurso pa tur esnan presente, stakeholders di Gobierno di Aruba, Ministernan, Parlamentarionan, esnan di sector priva, NGOs, y representantenan di nos institutonan academic.
“Awe nos tey pa celebra hunto cu boso un milestone grandi den area di innovacion. 2018 tabata un aña cu retonan grandi tras lomba pero tambe un aña cu a trece hopi oportunidadnan nobo. FUTURA ta un di e pasonan grandi den e direccion di innovacion cu e meta pa diversifa economia di nos pais. Como gobierno nos mester construi un sistema cu ta stimula e creatividad y crea un manera nobo di pensa.
Mas y mas nos mundo ta poniendo balor riba e poder di innovacion. Mi ta kere den crea un sistema pa inspira e generacionnan nobo pa bira personanan cu ta bay mas leu cu loke ta ordinario. Como Gobierno di Aruba nos a prioritisa e ser humano, pa nan ta ekipa cu e habilidadnan necesario pa transforma nos nacion den uno dinamico.
Nos mester di crea un cultura cu ta encurasha colaboracion, especialmente door cu nos tin recursonan limita. Gobierno, sector priva, departmantonan; nos mester cambia nos manera di pensa; nos mester ta mas habri pa comparti informacion y traha hunto pa logra metanan cu nos tin en comun, y cu ta den bienestar di tur.
Nos mester traha diferente, y nos ta conta cu colaboracion entre tur stakeholder pa nos trece un cambio cu nos comunidad mester.
FUTURA tey tambe entre otro pa facilita colaboracion, conecta y buska sinergia den diferente proyecto y iniciativanan, y tambe pa ta un ‘think-tank’. Awe mi kier a felicita FUTURA cu e lansamento di nan Website nobo, y tambe pa trece nos tur hunto na e evento aki.
Cambio no lo pasa di un dia pa otro, pero e ta tuma confiansa di boso como stakeholders, nos tin mester di mas ‘buy-in’ posibel, y nos ta sinti, cu dianan manera awe, cu nos ta cerca di e meta aki”, Prome Minister a expresa diabierna anochi durante un anochi ameno.