“Bao di su maneho a endeuda Pais Aruba di 40% pa 90% di debe”
Parlamentario Endy Croes ta splica di ta su deber pa reacciona riba cualkier miembro di AVP sin distincion momento cu nan troce berdad. Nos t’ey pa recorda e pueblo y corigi cualkier manipulacion. Na 2013 AVP a gana eleccion cu 13 asiento basa riba kiezersbedrog. Pues a campaña cu un cantidad di manipulacion y engaño y a cumpra votonan cu placa di pueblo na gran escala engañando nos pueblo cu contractonan di 6 luna.
Redoblacion di debenan
Na 2017 apesar cu AVP a usa e mesun strategia cu pueblo a straf nan cu mas di 10 mil voto cual tabata un golpi duro pa nan y mas aun manda nan oposicion cual te awe hopi di nan tin problema pa acepta. Cuminsando di Mike Eman nan propio lider cu a bay sconde den su penthouse y rato rato ta purba sali purbando pa crea un sensacion depende e topico. Mike De Meza, un ex minister corupto te den su higra y tempo lo mustra esaki kier critica maneho di Minister di Finansa. Mester refresca Mike de Meza su memoria cu na 2008 e debe nacional di Pais Aruba tabata na 41.7% (mira tabel di Banco Central) y na 2017 esaki a alcansa 90%. Pues di cada florin cu drenta caha di gobierno 90 cen ta bay pa paga debenan cu Mike Eman y Mike de Meza a ocasiona den ultimo 8 añanan. Kico AVP a logra cu e maneho financiero di Mike de Meza? AVP a logra redobla e debe nacional. AVP bao maneho di Mike de Meza a logra redobla interes riba placa presta. Na 2018 Aruba a paga 219 MIYON solamente na interes riba placa cu AVP a presta. Esaki ta mas di 600 mil florin pa cada dia.
Proyectonan PPP
Bao di e maneho desastroso di Mike de Meza y AVP a firma tur e proyectonan PPP unda pueblo di Aruba lo cuminsa paga 80.9 MIYON pa aña pa 20 aña largo. Mas tristo ningun caminda AVP a presupuesta esaki ni a pensa di unda lo saca 80 MIYON extra pa aña pa 20 aña largo. Hustamente gobierno actual a haye cu e batata cayente y mester a resolve esaki tambe pa garantisa e pagonan pa pais Aruba no haye den problema. Ta apenas na maart 2018 pueblo a caba di paga e desaster di garantia na hotelnan Beta y Ramada di Henny Eman, ruman grandi di Mike Eman y AVP unda Aruba a paga 200 MIYON pa 15 aña largo sin haya un hotel a cambio, pues un rip off completo. Ladron ta keda chikito banda di e hendenan aki. Cabando di paga debenan di e ruman grandi awor mester cuminsa cu e desaster di e ruman chikito. Asina Mike de Meza y AVP a maneha e pais aki. A la Wild West.
Ladronicia di patrimonio
Banda di esaki corupcionnan na gran escala cu tabata pasa bao di nan nanishi sinta den Cocolishi, tanto e caso di IBIS di Paul Croes a prueba esaki como e caso di terenonan di Benny Sevinger cu Leoncita lo bay mustra con grandi e corupcion y ladronicia di patrimonio di pueblo di tanto Mike Eman, Mike De Meza y Benny Sevinger ta. Berguensa pa awe Mike de Meza e autor di e desaster kier critica Minister Xiomara Ruiz Maduro kende apenas ta emplementando e formula di rescate di e desaster cu a wordo hereda. Parlamentario Endy Croes ta termina bisando ki ora un politico di AVP papia e mester por spera un reaccion den su direccion. AVP nunca pero nunca mas lo por bolbe.
