Oranjestad – Durante un encuentro cu e personal di Departamento di Asuntonan Economico y den presencia di Minister sra. Xiomara Ruiz-Maduro, funcionarionan di Departamento di Asuntonan Economico a lansa e logo y website nobo di e departamento.
Directora di Departamento di Asuntonan Economico, sra. Maria Dijkhoff – Pita a splica cu e modernizacion di e logo y website nobo ta pas den cuadro di e vision economico di Gobierno.
Sra. Sharon Meijer – van der Linden, Policy Advisor di Departamento di Asuntonan Economico a duna un splicacion extenso tocante di e logo y website nobo di e Departamento.
Sra. Meijer a splica cu e logo nobo ta consisti di un elemento grafico (icon), abreviacion y nomber di e Departamento. E logo ta un logo multilingual, ya cu Aruba ta un Pais multicultural. E nomber oficial di e Departamento ta na hulandes ‘Directie Economische Zaken, Handel en Industrie (DEZHI) y tambe ta uza e nomber na Ingles ‘Department of Economic Affairs, Commerce and Industry of Aruba (DEACI).
E icon ta consisti di tres stapel di moneda cu un flecha cu ta bay ariba. E ilustracion grafico aki ta simbolisa actividad economico di un economia creciente cu ta consisti di inversion y exportacion.
E monedanan ta representa e actividad economico cu ta midi cu placa y e flecha cu ta bay ariba ta simbolisa e economia creciente.
E logo ta consisti di e colornan blauw, oro y shinishi. E colornan blauw ta para pa e confiansa den Gobierno y su departamentonan, e fieldad den e principio pa hiba gobierno dilanti den cada servicio cu ta ofreci y cada negoshi cu a haya ayudo. Alaves e color blauw ta simbolisa e inteligencia; e vision di e departamento pa desaroya DEZHI den un departamento di gobierno ehemplar. E color shinishi ta acentua e parti formal di DEZHI.
A diseña e website nobo www.deaci.com den cuadro cu e vision di Gobierno y Minister di Finansa, Asuntonan Economico y Cultura sra. Xiomara Ruiz-Maduro cu ta promove e clima di negoshi y stimula un economia inovativo, competitivo y diversifica pa asina contribui na un mihor calidad di bida pa tur su ciudadano.
Sra. Dijkhoff-Pita a enfatisa cu e website nobo ta brinda mas informacion pa esnan cu kier habri un negoshi y hopi otro informacion cu ta regarda economia. Alaves e website nobo ta pa facilita esnan cu kier habri un negoshi y mester di un permiso; ya cu desde dialuna 4 di februari por haci un cita via di e website www.deaci.aw
E directora di Departamento di Asuntonan Economico a termina yamando danki na e personal di e Departamento, en especial Sra. Sharon Meijer-van der Linden cu a coordina e proyecto di logo y website nobo.