Manera ta conoci pa combati criminalidad eficaz y garantisa orden publico tin diferente protocol entre departamentonan hudicial local internacional y militarnan.
AYUDO DI MILITARNAN DEN CUADRO DI ORDEN PUBLICO
Algun tempo pasa Minister di Husticia a informa Parlamento cu e procedura pa haci uzo di militarnan (zachte bijstand) pa yuda departamentonan hudicial local a wordo adapta. E adaptacion aki mester a haci’e posibel pa mas eficiente por uza e capacidad militar pa cierto tareanan. Mescos cu e protocol di RST, pa loke ta e ayudo aki ora ta trata (zachte bijstand) autoridad mester keda cerca pais Aruba.
PREOCUPACION DI PARLAMENTO
Informacion cu nos a ricibi ta indica cu ta mal uza e procedura adapta aki pa haci uzo di militarnan Hulandes den investigacionnan penal. Alarmante ta cu esaki ta sosode sin cu autoridadnan local ta na altura. Obviamente esaki ta trece peliger pa coleganan cu ta labora den e cadena hudicial, pero na mesun momento e ta mina nos autonomia hudicial tambe. No por ta asina cu militarnan Hulandes ta wordo uza y ta raporta na Corsow y Hulanda.
Importante pa nota tambe ta cu un peticion di e indole aki semper mester wordo inicia door di Cuerpo Policial. Cuerpo policial ta e autoridad pa loke ta nos seguridad interno y e so sa si tin capacidad of experticio pa atende cu aspectonan investigativo.
REUNION URGENTE
A tuma contacto cu Minister di Husticia y invit’e pa un reunion di urgencia riba e desaroyo aki, pa trece claridad cerca e comishon fiho di Parlamento encarga cu asuntonan hudicial. Fraccion di MEP ta pro colaboracion cu militarnan den e caso aki, pero no por mal uza palabracionnan pa mina autoridad local.
E reunion lo tuma lugar diaranson merdia 2pm na Parlamento. Nos ta sigur cu lo bin aclaracion pero na mes momento tambe kier splica cu Parlamento no lo tolera e proceder aki.