A trata topiconan di importancia pa loke ta ICAO
Durante conferencia di prensa di Gobierno, Minister di Transporte, Comunicacion y Sector Primario, sr. Chris Romero, a informa cu e tabata na Mexico recientemente pa atende diferente reunion di gran importancia pa loke ta aviacion civil.
Riba invitacion di e Organisacion Internacional di Aviacion Civil (ICAO), Minister Romero a reuni cu sr. Melvin Cintron, kende ta Director di e oficina di ICAO na Mexico cu ta responsabel pa Aruba. Durante e reunion aki a elabora riba diferente topico di interes y di sumo importancia pa loke ta nos aviacion civil. Entre otro, a papia riba e audit di ICAO na Reino Hulandes y e sistema online di ICAO pa monitor cumplimiento di e estadonan miembro.
Minister Romero a duna un actualisacion riba e trabounan cu a bin ta desplegando caba, como tambe a informa riba e plannan y metanan pa aña 2019.
Di e manera aki Minister Romero a re-afirma cu Aruba lo sigui ta parti di e programa di ICAO cu ta yuda paisnan eleva nan porcentahe di cumplimiento, cu ta carga nomber di “No Country Left Behind”. ICAO a expresa di ta hopi satisfecho cu e trabounan cu Aruba a bin ta haciendo ultimamente pa loke ta aviacion civil.
E delegacion di Aruba tambe a reuni cu Secretaria di Transporte di Mexico unda a hiba palabracionnan pa un acuerdo di transporte aereo entre Aruba y Mexico. Durante e reunion aki a keda palabra cu lo inicia e proceso di negociacion pa concretisa un Memorandum of Understanding (MoU) di transporte aereo entre Aruba y Mexico. Dicho MoU lo crea e oportunidad pa aerolineanan di Aruba haci vuelonan pa Mexico y companianan di Mexico haci vuelonan pa Aruba, cual lo ta beneficioso pa turismo y economia di nos pais.