ORANJESTAD – Minister di Finansa, Asuntonan Economico y Cultura Sra. mr. Xiomara Ruiz-Maduro a trece un discurso elocuente dilanti caminda ela enfatisa “Kende ta Betico”. Tin varios partinan di Minister Ruiz-Maduro su discruso cu a resalta grandemente den e mensahe cu ela trece na e publico presente. E mandatario a expresa cu hopi di nos kisas no tabata tin e dicha di por a conoce Betico Croes, como e hende, e politico, e gran estadista y e Libertador di nos Pais personalmente. Pero cada un di nos por lo general conoce su nomber, conoce algun di su logronan y ta disfruta di e trabao incansabel cu Betico a haci pa Aruba. Betico Croes ta un di e politiconan cu mas a resalta pa su trabao, e manera con el a sa di uni e Pueblo di Aruba y e determinacion pa logra e libertad cu ta permiti nos progresa como Pais.
E mandatario hiba un discurso bunita cu a toca curason di esnan presente. E curashi pa uni un pueblo y e determincacion pa haci todo por todo pa por logra e libertad den cual nos pueblo y pais por progresa, ta bon ehempelnan cu Betico Croes a laga atras cu te ainda ta relevante y ta bale la pena pa sigui. Betico Croes a haci nos consciente di e balor cu nos tin como un Pueblo den union y a brinda e ehempel cu ora bo ta determina bo por logra cosnan grandi cu ta beneficia no solamente bo mesun generacion, pero tambe e generacionnan cu ta sigui. Danki na Betico awe nos por papia di un pais den cual nos pueblo por identifica su mes cu nos propio idioma y ortografia na Papiamento, nos propio Himno y Bandera y nos propio moneda como simbolonan di nos identidad.
Sigur un discurso bunita cu ta duna balor na e legado di Betico Croes cu mester keda como ehempel pa nos tur sigui dilanti cu ne.