ORANJESTAD – Departamento di Asunto Economico, Comercio y Industria (DAECI) ta informa cu entrante awe a introduci un website nobo, www.deaci.aw. Aki tur persona por haya informacion di e servicionan cu e departamento ta brinda y tambe otro informacionan riba e tereno di economia y comercio en general.
Pa loke ta trata e seccion pa permiso pa negoshi (Business License /Vestiging van Bedrijven), nos ta informa tur cliente/comerciante cu, entrante februari 4, 2019, por haci un afspraak pa busca/ricibi informacion, entrega un petición, of pidi copia di un permiso.
Pa haci un cita pa e servicionan ariba menciona, ta bay riba e website (www.deaci.aw) riba e screen ta clik riba “Appointment”. Aki tin diferente opcion pa cu e servicio desea. Dependiendo di e servicio desea, esaki por ta solamente riba dialuna of otro servicionan solamente riba diamars, diahuebs y diabierna. Si ta desea di p.e. introduci peticion pa mas cu un compania/negoshi e cliente mester haci e afspraak pa cada un separa (diferente ora).
Pa esnan cu ta desea di ricibi nos servicio sin haci afspraak, tambe ta posibel riba diaranson parti mainta (walk-in / inlopen). Parti merdia nos no ta atende publico.
Ta importante pa informa cu, pa busca un permiso cu ta cla caba, no mester tin afspraak. Por pasa di dialuna pa diabierna, cu excepcion di diaranson merdia, na oficina nr. 21.
Orario pa atende cu publico ta 08:00 – 11:00 a.m. y 1:00 – 4:00 p.m.
Por fabor tene cuenta cu e informacion ariba menciona.
Departamento di Asunto Economico via nos seccion pa establecimento di negoshi ta spera cu asina nos lo por duna nos cliente un mihor servicio, teniendo na cuenta e importancia di e tempo di e cliente. Nos ta haciendo cambionan na bienestar di e cliente y comerciantenan en particular pa stimula e economia di Aruba.