Parlamentario Endy Croes ta felicita Gobierno di Aruba y Minister di Husticia mr. Andin Bikker cu e logronan grandi di ultimo siman. Siman pasa tabata un siman super ocupa cu representantenan di Reino y Islanan ruman. Aruba a fungi como anfitrion di e reunion entre Ministernan di Husticia di Reino, e asina yama JVO (Justitieel Vierlanden Overleg). Minister di Husticia di Hulanda professor. Mr. Ferdinand Grapperhaus, Minister di Husticia di Corsou mr. Quincy Girigorie, Minister di Husticia di St Maarten dr. Cornels de Weever, Andrew Hoo Korps Politie Aruba, Mauricio Sambo Korps Politie Curacao, Procureur General Aruba Alexander van Dam, Procureur General Curacao, St Maarten y BES eilanden Roger Bos y mas cu claro Minister di Husticia di Aruba mr. Andin Bikker ta entre esnan kendenan activamente a reuni pa yega na firma diferente protocol. Pa promer biaha den historia Staatsecretaris esta un Secretario de estado di Reino drs. Raymond Knops a participa den un JVO cual sigur a keda altamente aprecia. Minister Andin Bikker pa algun luna caba na multiple ocasion a acudi na Parlamento di Aruba den secionnan di Comision Fiho di Husticia presidi pa Rocco Tjon y asina tabata informa Parlamento di tur detaye di e desaroyonan cu tabata andando anticipando e fecha den januari 2019 unda esaki lo mester wordo firma. Na final di e JVO siman pasa a logra firma y renoba e protocol RST data desde 2001 (cual a inicia e tempo aya bao di maneho di ex minister Rudy Croes. RST ( Recherche Samenwerking Team) ta un cooperacion riba tereno di combati criminalidad internacional. Mesun momento a firma tambe KMar Protocol cual ta un protocol referente cooperacion cu Koninklijke Marechausee pa asistencia “temporal” den cuadro di por ehempel experticio pa por detecta paspoort falso of como ehempel si mester capacidad adicional “temporal” pa cu introduccion di fast ferry. Alaves a firma tambe un MOU pa cooperacion riba combatimento di trafico ilicito di hende. Minister Andin Bikker den henter e proceso a tene na cuenta constantemente e recomendacionnan di Parlamento y tambe di Sindicato di Polis, esta SPA. Locual a resalta cu a logra inclui entre otro un geschillenregeling den e Protocolnan mas algun recomendacionnan importante di tanto Parlamento y SPA cual a keda ancra den tur locual a wordo firma. Algun logro mas banda di e 2 Protocolnan y MOU cu a keda firma ta entre otro palabracion y adelanto riba introduccion di,1. un proyecto piloto pa por yega na un Academia di Ley comun,2. Digitalisacion di un Registro Central di Testament comun (CTR), 3. cooperacion riba tereno di innovacion den Husticia, 4. cuido forensico (forensische zorg) di detenidonan. Ademas di tur esakinan a aproba presupuesto di Corte Comun di Husticia unda Minister Andin Bikker a recorda esnan presente cu recientemente e promer Hues yiu di tera pa casonan di belasting a wordo huramenta cual ta algo historico. Esaki a bira posibel basa riba un amienda cu hustamente Sr. Bikker mes a presenta como delegado special den Tweede Kamer na aña 2010. Parlamentario Endy Croes kende tambe ta forma parti di Comision Fiho di Husticia den Parlamento a traha hopi di cerca den henter e procesonan aki y ta contento di por a combersa y intercambia idea cu tur e ehecutivonan, mandatarionan y Ministernan cu tabata na Aruba unda tur a keda impresiona na e manera cu Gobierno di Aruba y e Minister actual Sr. Andin Bikker a atende cu topiconan importante pa Husticia y logra tanto cosnan grandi pa pais den corto tempo. Sigur mas cu su antecesor a logra den 8 aña. Un Palabra di pabien na Gobierno di Aruba y sigur na Minister di Husticia y na tur esnan cu a duna nan granito di arena pa cu e logronan aki riba e tereno di Husticia.