Parlamentario Endy Croes a tuma nota di un reaccion bastante emocional di ex politico Melvin, cariñosamente yama Donkey Tromp den pueblo. Parlamentario Endy Croes a continua splicando cu na inicio di 2019 el a bay profundamente pa atende cu e tema di Lotto y a splica cu pe e ta considera esaki un caso cera como cu el a splica te den detayes y cu prueba alrespecto e caso aki. Den un persecucion politico di alrededor 8 aña largo contra di entre otro su persona a gasta mas di 2 Miyon florin di Fundacion Lotto pa Deporte na Ernst & Young y abogadonan amigo di AVP. Esaki hustamente Donkey no ta splica pueblo. Asina a trata na formula cualkier rason pa colga Endy Croes y Edmond Croes y tur e intentonan aki a fracasa pasobra no tabata tin net net nada cu a tuma lugar cu tabata for di sla.
Proyectonan di Lotto, 2001-2009
Pa refresca Donkey su memoria tur hende por mira y por pone nan man riba bunita proyectonan di Lotto cu a logra traha entre 2001 pa 2009. Sinembargo e directiva di AVP di november 2009 pa januari 2019 no por bisa mescos pasobra no a construi ni un solo proyecto deportivo. Un y tur core rond y mira e veldnan y facilidadnan deportivo mayoria den estado deplorabel. Minister actual sin CBN y sin Lotto a cuminsa e proceso pa drecha diferente facilidad y ya caba luznan pa SV Dragon Hitters y Flatstone a yega Aruba y den luna di februari lo wordo cambia mientras luznan di Kudawecha ta na caminda. Asina ta traha. Compleho deportivo Frans Figaroa ta un ehemplo di un ruina (di AVP 2001) cual a wordo converti den un hoya di un proyecto unda mas despues a inclui un facilidad pa AVB, esta Technical Center Angel Botta. Facilidadnan na Simeon Antonio (cual awor ta den super mal estado) y Jara a wordo construi cu placa di Lotto. Parke Curason Jaburibari a wordo converti di un dump (cu AVP a laga atras na 2001) pa un parke recreacional. Donkey por ta contra? Veld di Winston (Nadi Croes y Crismo Angela), veldnan na Pos Chiquito, a instala luz na veld di Flatstone, Arsenal y a mantene mayoria veld aki na Aruba den e periodo 2001-2009. Asina tin mucho mas. Pero e Lotto di AVP no a construi ni un solo facilidad den e ultimo 9 añanan. Ki berguensa!
Unda ta bay cu un bobo asina?
Melvin Donkey Tromp a sinta yora mey ora largo emocionalmente lesando cantidad di facetanan di rapport E&Y anto na final e mes ta bisa textualmente lo sigiuente “No papia di Ernst & Young pero papia di ACC & Partners”. Unda nos ta bay cu un bobo asina? Tur locual Melvin kier a pretende lesando rapport di E&Y a keda bari for di mesa, no pa un (1), no pa dos (2) pero pa 3 hues dia 16 di januari 2018 unda e 3 huesnan aki a declara lo siguiente den nan decision final “Verklaart voor recht dat Ernst & Young zich schuldig heeft gemaakt aan een onrechtmatige daad jegens Croes, zoals hiervoor in rov 2.69 overwogen”. (Adhunto e veredicto di 3 hues!). Pues 3 hues a kibra e rapport di E&Y for di otro confirmando e manipulacion y mentiranan cu nunca nan por a substancia y alaves trece e claridad di un persecucion politico hamas bisto, unda a ranca mas di 2 miyon florin di nos deportistanan esta di Lotto Pa Deporte pa saco di nan amigonan abogado y E&Y. Tur hende sa cu ex minister Bermudez di AVP tambe tabata forma parti como Partners di E&Y. 1+1 no por ta 3. A buen entendedor pocas palabras.
Parlamentario Endy Croes ta termina bisando cu “Laba cabes di burico bo ta gasta awa, gasta habon y perde bo tempo”.