A kibra glas pa saca dos mucha cu a keda cera den auto. Nunca laga menor di edad sin supervision

Italiestraat – Diahuebs atardi polis a bay dilanti e tienda yama Op=Op, pa dos criatura cu lo ta cera den un Hyundai Tucson. Esey tawata prome informacion.

Na yegada dilanti e luga nan ta topa cu e auto, esta e Hyundai Tucson pero ya e muchanan a wordo saca.
Parse un rato prome cu polis a yega, a kibra un glas di e auto pa a saca e muchanan.

Por a mira polis papiando cu e mama di e muchanan. Den su brasa un baby. Segun nos a compronde e dama lo a baha y un di e muchanan lo a mishi of tawata hunga den e auto. Algo a bay robes, caminda un di nan a lock e auto.

E glas a wordo kibra pa a saca e muchanan cu tawata ok, pues nada grave no a pasanan danki Dios.

Como adulto, mester pone bon tino ora di laga dos criatura den auto sin supervision.