Riba dia di Betico nos ta recorda con e lider aki a bringa pa awe nos por ta “baas den nos mesun cas”. E ta nos deber, como bon Arubiano, pa hamas laga su historia, nos historia bay perdi.
ESTILO DI LIDERAZGO
Betico Croes d.f.m. tawata un lider extraordinario. Su logronan ta e fruta di su determinacion, curashi y amor pa su pueblo.
Locual ta resalta ta cu Betico, den un era cu no tawata avansa qua tecnologia, a sa di uni e pueblo, pa bringa e causa husto. Pa e por e logra esaki el a desplega liderazgo yena cu carisma, amor, sinceridad y curashi.
BISHITA NA SCOL
Ta importante pa e generacion nobo sa cu ta danki na Betico Croes cu awe nos ta un pais autonomo den Reino Hulandes. Su lucha a conduci cu awe nos tin nos propio gobierno, propio parlamento, propio gobernador y propio Banco Central. Partido MEP ta haci bishitanan na scolnan basico pa splica e historia aki y pa nos generacion nobo sa cu esaki ta e resultado di trabounan grandi y valioso di Betico Croes, nos Libertador.