Riba Dia di Betico mi ta haci un esfuerso consciente pa mustra cu un pais no por existi sin historia y acontecimento politico. Rond mundo tur hende por wak esaki sea riba moneda di e pais of den nan salanan di gobernacion. Den region nos conoce sigur algun gran estadista kendenan mester a derama hopi sodor, lagrima hasta sanger pa para inhusticianan politico.
Betico a logra e deseo di pueblo
Na Aruba nos a conoce un gran Arubano di cuna humilde cu a dedica su bida pa saca Aruba fo’i di dobel colonialismo di Hulanda. Historia no por wordo troci. Varios politico a lucha pa Aruba haya mas libertad como isla pero niun no a percura pa Aruba sali di e constelacion Antiyano, crea lasonan estrecho cu Hulanda sea via un Status Aparte of Independencia totalmente. Ta Betico Croes efm a logra esaki y nos tur tin cu ta agradecido cu nos por a nace, crece, bira adulto y muri den un pais liber cu tur su instrumentonan pa autodeterminacion di nos pueblo den su totalidad.
Betico cu un mandato solido
Gobierno di Aruba tin cu concretisa e legado di nos gran estadista Gilberto François “Betico” Croes pa no troce e berdad mas y despues di 33 aña tur generacion Arubano mester por sa e historia politico di nos pais irespecto ken ta den Gobernacion Arubano. Durante Betico su lucha pa Aruba bira liber el a wordo golpia, a wordo benta den prison, a wordo tira, ta pa motibo cu Betico a hiba e liderazgo di e partido Movimiento Electoral di Puebo (MEP) cu a hiba e lucha di nos pueblo den fase di realisacion pa su libertad. Ta hopi hende a lucha cu Betico y nos tur mester semper duna nan e respet y balor cu nan merece. Betico a rebiba e deseo y a sa di guia nos pais pa e Status Aparte, prome di januari 1986 den prome participacion den Gobierno Antiyano. MEP a percura pa pasa mocion den Staten di Antiyas cu ta reconoce e derecho di cada pueblo. MEP, bao guia di Betico a inicia e proceso di pasa poder pa e isla di Aruba, esta e plan di decentralisacion. Pa medio di referendum, boicotia pa diferente partido na Aruba, pueblo a duna Betico un mandato cla y nos libertador a sa di cumpli cu e mandato noble aki te cu esaki a coste su bida na edad di 48 aña.
Nos amor patriotico pa Betico
Betico Croes: “Mi ta pidi merito pa e pueblo di Aruba cu a percura door di su inteligencia, audacia y perseverancia cu nos ta asina leu. Na tur generacion cu ta na bida awe, e tratamento aki ta den e esprito di rindi homenahe na e pueblo. Pero pa esnan cu a bay caba, cu a lucha y no a mira e libertad aki realiza, alavez nos ta rindi tributo na nan, pasobra ta nan a pone e base pa nos a sigui traha. E pueblo aki merece un pedestal. P’esey e “Movimiento di Libertad” di nos pueblo, no solamente mester ta un estatua di politiconan, sino primordialmente un monumento den cual cada Arubano, di acuerdo cu su historia, cultura y identidad ta reconoce su mes.”
Ban hisa nos bandera na nos hogar, ban buta nos banderin riba nos autonan, ban mobilisa grandemente den harmonia cu tur hende biba na Aruba pa demostra nos amor patriotico pa nos lider inmortal Gilberto François “Betico” Croes.