Parlamentario Endy Croes ta splica cu el a lesa e requisitoir di Ministerio Publico cual ta contene 171 pagina por completo. En berdad ta un caso grandi y complica cu pruebanan palpabel con e operacion criminal aki tabata tuma lugar. Locual a haci esaki mas fuerte ta e tantisimo grabacionnan, esta tapmento di telefon y microfono instala den entre otro dienstwagen di e ex minister cual a trece claridad den henter e asunto.
Mike a coba graf pa Paul
Parlamentario Endy Croes den su analisis ta splica cu Mike Eman y Dowers a comete un acto di traicion contra nan colega. No cu Parlamentario Endy Croes kier defende Paul pero ta splica su pensamento. Mike Eman di AVP por a actua diferente pa minimalisa e daño tanto na pais Aruba como tambe na su propio colega Paul Croes. Mike Eman, Dowers y AVP tabata na altura desde “day one”, esta desde 2016 kico ta bay pasa cu nan colega. Mike Eman y Dowers a firma pa e tapmentonan aki incorporando expertonan di Hulanda pa cu e investigacion. Parlamentario Endy Croes ta puntra con por ta posibel cu bo ta reuni dos bes pa siman den Ministerraad cu Paul, bo ta hari cu Paul na mesa, bo ta bay receptienan di trabao hunto cu Paul, bo ta reparti cartonnan di sushi di AVP prome cu paradanan di carnaval hunto cu Paul, bo ta grita invitando Paul den aire na Canal 90, momento cu ya nan a pone riba non actief, pa sali bay campaña y a logra convence Paul pa subi stage na apertura di oficina di Mike De Meza, anto bo ta bon bon na altura kico tabata tumando lugar. Mike Eman y Dowers tabata sa perfectamente cu a coba e graf pa Paul y lag’e cay aden. En bes di a yam’e aden pa purba corigi su eror y kisas kita e posicion di minister for di dje, a scoge pa e rumbo di traicion.
Di e forma aki tabata parti e botin
Di otro banda Benny Sevinger si a scapa su “best friend” Radi di e catastrofe aki. Pueblo ta corda con Benny Sevinger a kita tur autoridad di Radi na DIMAS den mesun aña cu e investigacion a inicia? Esaki ta meramente pasobra Benny tambe tabata na altura di e festival di tapmento cu lo inicia y e tal “Radi” muy posiblemente pa e banda di Benny lo por ta den e CLAN. Corda cu Paul ta firma ontheffing pa haci negativo bira positivo y tin pruebanan fuerte cu e tabata ricibi placa a cambio. Esaki ta segun investigacion y grabacionnan y un administracion cu a haya na cas di J Feliciano kende tabata skirbi cu 750 florin ta bay pe, 750 ta bay pa un tal Schwengle y 3000 of 3500 cada biaha pa Paul Croes. Momento bo haya ontheffing y pues un conseho positivo e ora apenas bo por introduci e papelnan na DIMAS pa saca e permiso y muy probablemente akinan e “CLAN” di Benny lo tabata cobra e clientenan un otro suma pa e proceso aki. Wel Benny mester a ricibi informacion di Mike Eman of Dowers di e investigacion y tapmento riguroso pa cu Paul y tur esnan envolvi unda Benny pa protega su “CLAN” a stop su operacion na tempo y laga Paul cay manera patia berde.
Yiunan di tera a keda sin trabao
Ministerio Publico ta splica riba pagina 169 “Je moet niet boos zijn op de overheid maar op jezelf”. Un otro pasahe den e documento di Ministerio Publico riba pagina 170 ta splica “Doordat Paul Croes stelselmatig toestemming verleende tot toetreden tot de Arubaanse arbeidsmarkt. Ook in gevallen waarin dit evident onjuist was, zijn er onnodig veel vreemdelingen Aruba binnen gekomen en dus ook onnodig veel Arubanen zonder werk gebleven.” Pues Ministerio Publico ta splica akinan cu e decisionnan robes di e ex Minister cual no tabata necesario den diferente caso tabata evidente cu no mester tabata asina, ta e causa cu masha hopi yiu di tera awe a keda sin trabao. Pa tur e pruebanan cu Ministerio Publico a compila via tapmento, whatsapp, scucha testigonan Ministerio Publico a pidi 5 aña di prison pa Paul Croes. Abogadonan di sospechosonan lo hiba nan defensa durante e siman aki pa purba baha e castigo proponi. Dentro di algun siman Hues lo duna su veredicto final. AVP ta keda un partido sinberguensa y abusador.