Nos a drenta e siman na unda Aruba completo ta preparando pa celebra e fecha natal di un gran lider y estadista di nos pais, Gilberto François ‘Betico Croes’. Aruba ta recorda e balentia di un luchador incansabel cu a logra nos Status Aparte. Nos ta den momentonan of dianan na unda cu nos pueblo ta papia y conta di e gran Arubiano aki. Y na scolnan, esaki no ta diferente. Maestronan ta dedica oranan di dia ta siñando nos muchanan e storia di Betico Croes.
Prome Minister Evelyn Wever-Croes, dialuna mainta tempran a cuminsa cu un recorido na diferente scol basico na Aruba. Scolnan cu nos Premier a bishita ta; Piux X Basis School na Dakota, Scol Basico Washington na Noord, Rosario Colege na Oranjestad y Maria School na Santa Cruz. Prome Minister a expresa su deseo di por a bishita tur scol na Aruba pero sinembargo pa motibo di tempo esaki no ta posibel pa cua motibo a scoge un scol den cada districto di Aruba.
E mandatario principal di nos pais a comparti hopi informacion di e historia di bida y trabou di Betico Croes. Prome Minister a expresa su alegria y satisfaccion cu nos muchanan sa Ken ta Betico y tin hopi interes pa nos cultura, especialmente nos musica. Pa esaki, Prome Minister ta duna elogio na mayornan y na nos educadornan kendenan ta conta nos muchanan tocante Betico y loke cu e ta nifica den pasado, presente y futuro di nos pais.
Ta di admira tambe con cada klas ta dorna na colornan di nos bandera y cu pinturanan y obranan di arte dedica na Betico Croes. Muchanan y maestronan tawata sumamente entusiasma cu e bishita di Prome Minister na nan scol.
Pa ocacion di Dia di Betico, Gobierno di Aruba a organisa un competencia di pintura pa nos muchanan. Prome Minister a enfatisa cu e proyecto aki ta pa conscientisa y encurasha famianan haci algo hunto papiando di nos gran Lider, Betico Croes, como cu nos ta den aña di Famia. E Pintura ta obtenibel awe dialuna y diamars den prense local. E Pintura mester wordo entrega na MFA’nan y na oficina di Gobierno Edison Briesen na San Nicolas. Ganador lo ricibi un tablet.