Parlamentario Endy Croes ta splica cu masha hopi di nos pensionadonan a sinti un indignacion bastante fuerte momento cu SVB siman pasa a anuncia cu pensionadonan cu un of mas pensioen sea AOV of AWW y unda cu e total acumula ta surpasa Afl.1132 lo no ricibi reparatietoeslag mas desde februari 2019. Parlamentario Endy Croes tambe a ricibi masha hopi yamada y of whatsapp alrespecto. Mas cu claro mester bisa cu tin masha hopi trabao ta wordo haci pa asina por corigi e “desaster financiero” cu Mike Eman y AVP a laga atras. Dianan di trabao no ta baha bou 12 pa 14 ora pa dia pa un gobernante. Esaki ta standard.
Pensionadonan por ta trankil
Nos a hereda berdaderamente un caos di AVP. Esaki ta sin papia di e corupcionnan na cantidad cual poco poco ta mirando luz di dia. Den e tantisimo trabaonan aki talbes tin algo cu por “skip” un gobernante pero hamas lo permiti ningun “eror” den direccion di nos pensionadonan. Esaki mester ta e mensahe y nos pensionadonan por ta trankil cu unda tin hende ta traha talbes un eror administrativo por tuma lugar pero ta pa e motibo aki a eligi un gobierno Social Democrata cu hendenan cu tin oido y curason pa nos pueblo poniendo e ser humano central. Den e programa di gobernacion “Hunto pa Aruba” 2017-2021 a dedica na pagina 8 un seccion cu multiple trabaonan cu mester wordo ehecuta hustamente pa acomoda y mehora e calidad di bida di nos pensionadonan. Esey ta nos “motto” y esey nos lo cumpli cune. Nos por ta orguyoso cu nos Promer Minister Evelyn Wever Croes desde inicio di gobernacion den un tempo hopi dificil y retonan grandi mesora a brinda e promer atencionnan na nos grandinan.
Beneficionan pa pensionadonan
A aumenta pensioen di biehes cu Afl. 42,- pa luna pa parehanan casa, a aumenta pensioen di biehes cu Afl.25,- pa luna pa pensionadonan cu no ta casa. A baha loonbelasting di pensionadonan. A baha e prima di pensioen di AZV di 10.5% pa 6.5%, esta un reduccion di 4%. A aumenta e reparatietoeslag di Afl.100 pa Afl.125, esta cu Afl.25,-. Esaki ta significa cu “TUR” pensionado lo ricibi un reparatietoeslag total di Afl.125,- pa luna. Si pa cualkier rason un of mas pensionado por a sinti cualkier angustia cu e anuncio di SVB na inicio di aña, ami como Parlamentario Endy Croes kier pidi un disculpa si esaki por a causa cualkier dolor, inkietud of iritacion. Parlamentario Croes ta splica cu e kier garantisa cu nan t’ey pa traha pa pueblo y sigur pa nos pensionadonan.
Parlamentario Endy Croes ta gradici nos Promer Minister Evelyn Wever Croes pa accionnan tuma den cuadro di nos promesanan na nos pensionadonan y e programa “Hunto pa Aruba” y den nomber di Gobierno di Aruba Promer Minister a cumpli unda “TUR” pero “TUR” pensionado cu un of mas pensioen acumula sin importa cuanto bo pensioen ta, lo ricibi e “reparatietoeslag” di Afl.125,- . Nos a priminti y nos ta cumpli!!!