ORANJESTAD – Diabierna ultimo Minister di Finansa, Asuntonan Economico y Cultura a presencia un bunita show pa duna honor na un pionero den musica di Carnaval na nos Pais, Sr. Edgar Connor den felis memoria. Na ocasion di su fecha natalicio di 80 aña a organisa un steelband extravagansa ‘Honor to Connor’ den Mainstreet na San Nicolas. Tabata bunita pa mira famia Connor y mas grupo y persona cu ta dedica na e arte di toca steelpan, resona e musica cu ta na cuna di nos Carnaval di Aruba. Minister Ruiz-Maduro a trece dilanti cu a reina un ambiente dushi cu a corda nos di e tempo cu nos tabata chikito y cu nos Omo Chomon tabata hiba nos bay wak y disfruta di Carnaval cu e tempo ey tabata pasa den e Mainstreet na San Nicolas bao tono predominante di e musica di steelpan. E mandatario a manda palabra di Pabien na famia Connor pa tene e tradicion y arte di steelpan bibo na honor di e Cultura di Aruba.
