Dia 25 di januari, Aruba ta conmemora e fecha natal di un gran lider, Betico Croes. Pa e ocacion aki. Gobierno di Aruba tin diferente actividadnan. Prome Minister Evelyn Wever-Croes ta haci bishita na algun scol na Aruba.
Betico Croes no ta un desconoci pa Aruba, sinembargo tin un generacion cu no conoce hopi di e gran yiu di tera aki. Pa e motibo aki, prome cu 25 di januari, enfasis di Gobierno di Aruba ta pa papia mas di Ken ta Betico. Kico Betico a haci y kico el a logra pa nos pueblo. Durante su bishita na algun scolnan, Prome Minister lo conta e muchanan mas tocante Ken ta Betico.
Gobierno di Aruba a organisa un competencia di pintamento tambe pa nos muchanan cu kier participa. E pintura lo sali den corantnan Diario, Solo di Pueblo y Bon dia Aruba dialuna y diamars awo. E muchanan por pinta e pintura na nan smaak y tin un espacio cortico pa nan expresa cu nan mesun palabranan Ken ta Betico. E Pintura mester wordo entrega diaranson of diahuebs na e oficinanan di MFA’nan y na oficina di Gobierno Edison Briesen na San Nicolas. Ganadornan lo ricibi un tablet.
Prome Minister ta encurasha mayornan pa di e forma aki, envolvi nan yiunan mas pa sa Ken ta Betico. Tuma e oportunidad mientras e muchanan ta pinta e pintura, pa conta nan tocante Betico. Ta e intencion di Gobierno di Aruba, den Aña di Famia, cu e proyecto aki, stimula famianan bin hunto y papia di e tema Ken ta Betico. Ta importante pa nos generacionnan conoce Ken ta Betico. Esaki no tin nada di haber cu politica sino cu Betico como persona cu a lucha pa bay dilanti. Cu a bay Hulanda studia pa bira meneer di scol, a casa y forma un hogar di 4 yiu, y a realisa cu e por haci mas pa su isla. El a sinti’e un tata di henter un comunidad. A lucha incansabelmente pa Aruba haya su Status Aparte.
Cada mucha na Aruba, mester wordo siña y duna e norma y balornan importante pa e por ta exitoso den bida. Kico mas bunita cu duna nos muchanan un role model manera Betico Croes, un hende cu a desaroya mescos cu tur mucha, a nace den un hogar humilde, a lucha pa bay su scol, a studia na Hulanda, a traha, y a lucha pa nos pais. E amor cu Betico tawata tin pa Aruba, tawata mas grandi cu cualkier otro cos. Su dedicacion na nos pueblo, el a mustra cu e sacrificionan grandi cu el a haci. Betico tawata tin curashi pa bay te Hulanda y descuti cu Gobierno Hulandes pa e autonomia di Aruba. E tawata determina y no a laga niun hende strobe den su caminda. E tawata tin un amor inmenso pa su yiunan, pa su famia y pa henter e comunidad.