ORANJESTAD – Diranson atardi Minister Ruiz-Maduro tabata tin e placer di reuni cu dos artista Arubiano Jeon y Issael pa asina scucha di nan plan pa promove nos dushi idioma Papiamento local y internacional. Sigur nos ta orguyoso cu Aruba por conta cu hobennan asina talentoso y mas orguyoso di por mira cu nan ta scohe pa expresa nan talento haciendo uso di nos idioma materno. Como mandatario encarga cu Cultura nos ta apoya y gradici Jeon pa duna Papiamento un lugar asina special riba e tarima internacional. Di e forma aki no solamente mundo ta haya oportunidad di conoce nos dushi idioma, pero na Aruba specialmente nos hobennan por wordo inspira y concientisa cu nos idioma Papiamento ta importante y cu ta bale la pena pa sini’e, papi’e y cuid’e!