Gabinete MEPPORRED tin un maneho di persecucion politico, implementa medida contra pueblo y tambe pa encarcela hende y esaki un biaha mas a keda confirma y comproba ora cu siman pasa e gobierno aki a bay over na suspende y inicia e proceso pa retira e director di Utilities NV.
Miembro di fraccion di AVP den Parlamento, sr Mike de Meza a mustra cu esaki ta demostra un biaha mas e mentalidad cu cual e gobierno aki ta hibando su maneho caminda ya caba diferente director di departamentonan a wordo retira for di nan posicion, entre nan Marc Oduber di Meteo, Geradl Keteldijk di departamento di transporte publico, Gerald Fingal di departamento di inmigracion, tambe recientemente director di Elmar NV sr Robert Henriquez kende por cierto prome minister Evelyne Wever Croes encarga cu e departamento aki, a hasta gaña den porta di misa, mama di e director aki cu ta trata di solamente un suspencion pa haci un investigacion pero cu nada lo pasa cu e señora su yiu.
“Sinembargo algun dia despues e propio secretaria di prome minister a entrega e carta di retiro na e director di Elmar y ora cu prensa e puntra Evelyne Wever Croes riba e decision aki, no solamente el a confirma di a gaña mama di e persona aki pero a gaña prensa tambe cu su persona no ta na altura mes cu e persona aki a wordo retira.
Como aandeelhouder ta e persona di Evelyne Wever Croes ta e minister responsabel pa maneho di companianan di gobierno en general mientras cu directornan no por wordo retira dor di ningun Raad van Commisaris of cualkier otro persona cu no ta prome minister.
Na mes momento nos por a mira tambe sr Blijden di Warda Nos Costa wordo suspendi y manda cas y tambe otro 300 mama y tata di famia y ta di lamenta ya cu na luga di cu e gobierno di Evelyne cuminsa goberna, ya cu nos ta bayendo su di dos aña den gobernacion, por mira cu no tin nada cu e gobierno di coalicion aki ta bezig cune cu ta Sali na interes general di e pueblo di Aruba.
E unico cos e gobierno aki a sa di haci te cu awor den su periodo den gobernacion, ta persecucion politico, medida riba lomba di pueblo y purba encarcela hendenan den servicio di gobierno y hasta a bay asina leu na purba silencia medionan di comunicacion, entre nan Speed Andrade di 24Ora y tambe Mark Espinoza.
Tin mas hendenan di prensa cu a wordo tilda y persigui pero kendenan a wordo encarcela inhustamente y caminda depsues mester a laga nan bay pa falta di prueba y esaki ta bolbe tipifica e mentalidad di e gobierno aki y ta di lamenta pa mira cu tin tanto cos grandi cu mester wordo atendi na Aruba pero e gobernantenan aki ta sinta c’un pen y blachi pa mira ta kende ta nan oponente of kende nan ta kere ta nan oponente politico of simplemente ta kende a traha cu e gobierno anterior, haciendo un bon trabou y ta purba di desacredita e personanan aki.
Aki mi tin cu reitera e posicion di prome minister Evelyne Wever Croes kende ta conoci di ta gaña mas cu e ta papia berdad y ya caba el a gaña henter pueblo cu promesanan haci y cu nunca su gobierno a cumpli cu nan.
Ora cu a papia di hedging cu su gobierno a bay di acuerdo cune na comienso di 2018 despues cu tanto el a critica y cuestiona e gobierno anterior, ta para bisa cu e no sa nada di e hedging cu esaki ta den man di e companianan envolvi pero e sa tur cos cu ta tuma luga den e companianan aki ya cu nan tin cu informa e Raad van Commisaris y mester informa e aandeelhouder cu ta gobierno y esaki ta cay bou responsabilidad di su persona.
Un di e prome decisionnan cu Evelyne Wever Croes su gobierno a tuma ta di manda informa tur compania di utilidad di gobierno, e suma cu nan tin cu entrega na gobierno como parti di dividendo, pues tur cos cu a y ta pasa den e companianan aki, ta wordo informa directamente na e prome minister y e tin cu aproba esaki tambe.
Ta prome biaha den historia di e pais aki cu pueblo ta conta c’un prome minister cu no ta compronde e palabra sinceridad, esta cu su persona Evelyne Wever Croes mestera ta sincero cu pueblo pa asina e por ta un mandatario honeste pero ta mustra cu simplemente e no sa con pa haci esaki,” Parlamentario Mike de Meza a declara.