Recientemente Prome Minister a reuni cu e Comision di Integridad. E Comision hunto cu Gabinete Wever Croes a cuminsa e aña nobo trahando duro riba e metanan cu Gobierno a propone pa loke ta traha integridad. Desde inicio di gobernacion, hopi energia, dedicacion y determinacion a wordo poni pa atende cu e tema di integridad. E Gobierno actual a bin encontra un aparato gubernamental demotiva y cu no tabata funciona debi na corupcion na gran escala cu tabata tuma luga den e Gobierno anterior.
Mirando e seriedad di e problema cu integridad den aparato gubernamental, Gabinete Wever Croes a cuminsa cu e prome paso pa establece e ‘Bureau Integriteit’ cuminsando pa encarga señora Amalin Flanegin pa coordina y percura pa e bureau wordo institui cu su personal y proceduranan mas pronto posibel.
E Bureau Integriteit tin e tarea di “screen” decisionnan grandi di Gobierno, como tambe pa loke ta regarda e partidonan politico y obliga nan por medio di ley pa publica un lista for di ken nan a haya donacionnan grandi y registra e donacionnan cu nan a ricibi.
Tambe lo tin cambio di e ley di destaho publico. E ley cu tin actual ta laga espacio pa hopi interpretacion y awo cu cambio di ley esaki lo bira mas cla kico ta e reglanan y con estricto nan lo ta. Manera esaki ta cla lo sigui e pasonan pa ehecuta e otro leynan. Un ley cu tin financiamento riba e presupuesto y ta wardando riba Parlamento pa esaki pasa, ta e ley di e defensor di pueblo, esta e “Ombudsman”.
Prome Minister ta subraya cu e reglanan di integridad no lo conta solamente pa e empleadonan publico y e departamentonan di gobierno of pa Gobierno, pero tambe e reglanan di integridad lo conta pa companianan estatal di Gobierno.
Prome Minister Evelyn Wever-Croes: “Integridad ta hopi importante den programa di gobernacion di Gabinete Wever-Croes. Bon Gobernacion ta depende riba tur departamento di Gobierno como tambe di cada gobernante di nos pais pa brinda e pueblo di Aruba e miho maneho”.
E trabounan ta finalisando segun plan y pronto lo publica vacaturanan pa Bureau Integriteit. Prome Minister a enfatisa cu Gobierno di Aruba lo traha riba e base legal di e Bureau Integriteit pa asina sigura cu ningun gobierno den futuro purba elimina e Bureau importante aki. Asina aki, Gabinete Wever-Croes ta pone e base firme pa garantisa integridad den Gobierno como den departamentonan gubernamental y companianan estatal.